«Առաջարկվող փոփոխություններն ինչպե՞ս են ազդելու ձեր վկայաբերած գործի վրա, երբ դրանք ուժի մեջ են մտնելու 2022-ից». Բաբաջանյանը՝ Բադասյանին

Այսօր Աժ նիստում, ՀՀ քրեական դատավարության օրենսգրքում փոփոխություն կատարելու վերաբերյալ քննարկման ժամանակ պատգամավոր Արման Բաբաջանյանը, դիմելով արդարադատության նախարար Ռուստամ Բադասյանին, ասաց.

«Նախօրեին, երբ ներկայացնում էիք օրենքի հիմնավորումը և այս փոփոխություններին դիմելու դրդապատճառներից մեկը, դուք վկայաբերեցիք այն դատական գործը, որն ընթանում է այս պահին, և առնվազն երկու տարի է, ինչ դատաքննության փուլ չենք կարողանում մտնել այդ գործով: Ես ուզում եմ հասկանալ՝ այս կարգավորումն ի՞նչ ձևով է անդրադառնալու, օրինակ, այդ գործի վրա, հատկապես, եթե չեմ սխալվում, այս փոփոխություններն ուժի մեջ են մտնելու 2022 թվականից»:

Ի պատասխան պատգամավորի՝ նախարարն ասաց.

«Իրականում ես կոնկրետ գործ չեմ վկայակոչել: Հասկանում եմ, թե ինչ գործի մասին եք խոսում, բայց միայն դա չի: Բազմաթիվ գործեր կան, որտեղ գործ ունենք իրավունքի չարաշահման հետ»:

Հիշեցնենք, որ քրեական դատավարության օրենսգրքում փոփոխություն կատարելու դեպքում առաջին անգամ որպես քրեական դատավարության սկզբունք ամրագրվում է իրավունքի չարաշահման արգելքը, հնարավորություն է տրվում ներդնել պահեստային դատավորի գաղափարը: Ռուստամ Բադասյանի խոսքով՝ դա հնարավարություն կտա բուն դատավորի փոփոխության դեպքում գործը նորից չսկսել:

Մանրամասները՝ տեսանյութում