«Արարատ Միրզոյանը թող հրավիրի նիստ և քննարկեն Անդրանիկ Քոչարյանի հայտարարությունը». Ն. Զոհրաբյան

«Երբ 2018-ին Նիկոլ Փաշինյանն իր համակիրների հետ գրավում էր ռազմավարական նշանակության շենքեր, երբ պատանդ էին վերցնում ԵՊՀ ռեկտորին, երբ գրավում էին ռադիոտան շենքը, իրենք հայտարարում էին, որ իրենք հեղափոխություն են անում, և հեղափոխության ժամանակ ցանկացած գործողություն օրինական է»,- այսօր՝ «Հայրենիքի փրկության շարժման» կազմակերպած անհնազանդության երթի ժամանակ լրագրողների հետ զրույցում ասաց ԲՀԿ-ական պատգամավոր Նաիրա Զոհրաբյանը՝ անդրադառնալով «Իմ քայլը» խմբակցության պատգամավոր Անդրանիկ Քոչարյանի՝ վերջին հայտարարությանը:

«Ես մի քանի գրառումներում ասել էի, որ նրանք, որոնք արդարացնում են Արցախի հանձնումը, որոնք ասում են, որ Արցախը մեր կոկորդին կանգնած ոսկոր էր, որոնք արդարացնում էին դավաճանությունը, այդ մարդիկ ինձ համար ժեխ են: Նիկոլ Փաշինյանն ու իր սորոսական խմբակը տրանսֆորմացրեց իմ խոսքը և փորձեցին ներկայացնել, որ ես մեր քաղաքացիներին անվանել եմ ժեխ: Ես հիմա դիմում եմ Արարատ Միրզոյանին. Պարո՛ն Միրզոյան, խանդավախությամբ, կատարելով Նիկոլի հանցագործ հրահանգը, դուք ինձ զրկեցիք հանձնաժողովի նախագահի լիազորություններից, ինչը հակասահմանադրական է և ես դիմել եմ ՍԴ: Ես սպասում եմ, որ Արարատ Միրզոյանը նույն էնտուզիազմով հրավիրի ԱԺ արտահերթ նիստ և քննարկեն Անդրանիկ Քոչարյանի հայտարարությունը, որն ասում է, որ շենքեր գրավողները պետք է իմանան, որ իրենց վրա կարող են կրակել»,- ասաց Զոհրաբյանը: