«Եթե հիմա խորհրդարանական ընտրություններ լինեին, Դոգը կդառնար խորհրդարանական մեծամասնություն». Ստ. Դանիելյան

Քաղաքագետ Ստեփան Դանիելյանը ֆեյսբուքյան իր էջում գրել է. «Մենք ունենք ֆեյք վարչապետ, ֆեյք խորհրդարան, ֆեյք քաղաքացիական հասարակություն և ֆեյքերով զբաղվող ֆեյք անվտանգության մարմիններ:
Ովքեր են այսօրվա Հայաստանի հերոսները՝ «Գագիկ Սողոմոնյանը», նրա ընդդիմախոս «Ռեգինա Պրազյանը», իսկ ով է ամենապետականամետ գործիչը, ճիշտ է, «Դոգ»-ն է։ Դոգը բարոյաէթիկական նորմերից է խոսում, ի տարբերություն խորհրդարանական մեծամասնության, հանդես է գալիս պետական շահի դիրքերից։ Դոգը ժամանակին ուներ իր նախատիպը, ֆրանսիական հեղափոխության ժամանակ Դոգի դերը կատարում էր Մարատը՝ «Ժողովրդի բարեկամը»։ Մարատը «Ժողովրդի բարեկամը» անունով թերթ էր տպում, բացահայտում ու պախարակում էր եղած արատները՝ անուն առ անում, ու կոչ էր անում աշխատացնել գիլիոտինը։ Մարատը խոսում էր ժողովրդի համար հասկանալի լեզվով, մատնանշում էր մեղավորներին և ժողովուրդը նրան սիրում էր։
Եթե հիմա խորհրդարանական ընտրություններ լինեին, Դոգը կդառնար խորհրդարանական մեծամասնություն, «Գագիկ Սողոմոնյանը» կլիներ Դոգի ընդդիմությունը, իսկ «Ռեգինա Պրազյանը» կդառնար արտախորհրդարանական ընդդիմություն, արևմտյան թևի քաղաքացիական հասարակության լիդերը։
Ինչու է այդպես ստացվել։ Որովհետև մենք հիմա ֆեյք պետությունում ենք ապրում, իսկ ֆեյք պետությունում մարդկանց հոգիներին տիրում են ֆեյքերն, իսկ այդ վիճակից դուրս գալու համար ամենամեծ լսարանը հավաքում է այդ ամենը բացահայտող ու դատաստան տեսնելու կոչով հանդես եկող «ժողովրդի բարեկամը»։
«Նիկոլ դավաճան», «Առանց Նիկոլ Հայաստան» կարգախոսները «Մերժիր Սերժին» կարգախոսի ժամանակակից տարբերակն է, սակայն դրանցով պետություն չես վերականգնի ու ապագային միտված քաղաքական դիսկուրս չես ձևավորի։ Սա ընդամենը հերթական Ցուկցվանգն է, այսինքն գնում ենք Պատի դիրքին, որտեղից ելքեր չկան»։