Այսօր տեղի ունեցավ Աշոտ Մելոյանն ընդդեմ Դավիթ Խաժակյանի գործով դատական նիստը

Երևանի ավագանու «Լույս» խմբակցության ղեկավար Դավիթ Խաժակյանը ֆեյսբուքյան իր էջում գրել է․ «Այսօր տեղի ունեցավ Աշոտ Մելոյանն ընդդեմ Դավիթ Խաժակյանի առաջին դատական նիստը, որտեղ հայցվորը պնդեց, թե ես վիրավորել եմ իր պատիվն ու արժանապատվությունը և զրպարտել եմ իրեն։ Պահանջում է շուրջ երեք միլիոն դրամ գումար։
Հիշեցնեմ, որ Կարգին հաղորդման նախկին դերասան Մելոյանը ներկայումս աշխատում է համայնքապատկան հիմնարկում՝ ըստ ինչ-որ արժանիքների։
Հայցի բովանդակությունը ինձ պարզապես ապշեցրեց․ դերասանը վիրավորանք և զրպարտություն է համարում այն հանգամանքը, որ ինքը Հայկ Մարությանի որոշմամբ աշխատում է թափառող կենդանիների վնասազերծման ՀՈԱԿ-ում։ Պնդեց նաև, որ իմ կողմից հրապարակված՝ իր խաղացած դերի լուսանկարը վիրավորական է իր համար։
Ինձ համար, անգամ ընդդիմադիր տրամաբանության մեջ անհասկանալի է, թե ինչպե՞ս կարելի է վիրավորվել քաղաքապետի որոշմամբ աշխատանք զբաղեցնելու հանգամանքից, առավել ևս երբ քաղաքապետը երբեմնի ընկեր է։ Իսկ եթե խաղացած դերը վիրավորական է եղել իր համար, ապա ինչո՞ւ է այն խաղացել»։