«Խնդրել ենք Վարչական դատարանին, որպեսզի ապացույցներ պահանջի պաշտոնից ազատելու հիմքերի վերաբերյալ». փաստաբան

ԳՇ պետի նախկին տեղակալ Տիրան Խաչատրյանի փաստաբան Վարուժան Ավետիքյանն այսօր նոր դիմում է մուտքագրել դատարան՝ գեներալ-լեյտենանտին պաշտոնից ազատելու ապօրինությունների վերաբերյալ։

Լրագրողների հետ զրույց պատասխանելով հարցին, թե Տիրան Խաչատրյանը, որը ծիծաղելու համար է ազատվել, իրավական ի՞նչ ձևակերպում է ստացել, օրենքի ի՞նչ կետերով է այդ հիմքը ձևակերպվել վարչապետի կողմից, փաստաբանը պատասխանեց. «Ես, ճիշտն ասած, չգիտեմ ինչ հիմք է եղել: Մենք խնդրել ենք վարչական դատարանին, որպեսզի ապացույցներ պահանջվի հիմքերի մասին: Ես որպես Տ. Խաչատրյանի շահերի ներկայացուցիչ, չգիտեմ ինչ հիմքով է մարդը ազատվել: Սա նաև օրենսդրական կարևոր բացերից մեկն է, որ բարձրագույն զինվորական պաշտոն զբաղեցնողը, կարծես թե, կարող է առանց հիմքի ազատվել»,-ասաց նա:

Հարցին՝ Տիրան Խաչատրյանը գնո՞ւմ է աշխատանքի, պաշտպանն ասաց. «Որքան գիտեմ, երեկ եղել է ԳՇ-ում: Նա, իմ կարծիքով, այս պահին ԳՇ պետի առաջին տեղակալն է հանդիսանում»:

Հիշեցնենք՝ փաստաբան Վարուժան Ավետիքյանը նախօրեին հայտարարություն էր տարածել՝ նշելով․ «Հայաստանի ազգային հերոս, գեներալ-լեյտենանտ Տիրան Խաչատրյանի նկատմամբ շարունակվում են ապօրինությունները»: