«Ձեռս թո՛ղ, հլը»․ Խաչատուրովի պաշտպանը՝ ոստիկանին

«Մեծ հաշվով ես այստեղ չեմ եկել դատական նիստի, որովհետև ամսի 26-ից իմ դատավարական կարգավիճակը փաստացի դադարեցված է․ չկա էս գործով քրեական օրինական մեղադրանք, չկա ամբաստանյալ, չկա ամբաստանյալի պաշտպան։ Ես էսօր եկել էի կոնկրետ որոշում ձեզնից ստանայի և հեռանայի դատարանից․․․»,- այսօր՝ Ռոբերտ Քոչարյանի և մյուսների գործով դատական նիստի ժամանակ, հայտարարեց սույն գործով անցնող Յուրի Խաչատուրովի պաշտպան Միհրան Պողոսյանը։

«Հարգելի՛ դատարան, դուք պատկերացնո՞ւմ եք՝ ինչ եք անում, դուք ձեզ կողքից տեսե՞լ եք, դուք կուզե՞ք ձեզ դատի ձեր նման դատավորը»,- դիմելով դատավոր Աննա Դանիբեկյանին՝ հայտարարեց պաշտպանը։ Դատավորը կարգադրեց ոստիկանին վերցնել խոսափողը պաշտպանի ձեռքից, քանի որ վերջինը խախտել էր դատարանում կոռեկտության սահմանները։ Պողոսյանը հրաժարվեց ոստիկանին տալ խոսափողը։ «Ձեռս թո՛ղ, հլը»,- ասաց նա։ «Ձեռդ չեմ բռնում, խոսափողն եմ բռնում»,- պատասխանեց ոստիկանը։