«Ինչպե՞ս եք պատկերացնում՝ սահմանապահներ կանգնեն մի սահմանի վրա, որտեղ հակառակորդը զորք է պահում»․ Սիմոնյանը՝ Փաշինյանին

«Ռազմավարական հեռանկարում մենք պատկերացնում ենք, որ Հայաստանի պետական սահմանների այն հատվածների պահպանությունը, որն իրականացնում է ՀՀ ԶՈւ-ն, կդրվի սահմանապահների վրա, իսկ բանակի ստորաբաժանումները կզբաղվեն բացառապես մարտական պատրաստականության, մարտունակության բարձրացման հարցերով»,- այսօր՝ ԱԺ-ում ունեցած իր ելույթում, հայտարարեց վարչապետ Նիկոլ Փաշինյանը։

«Լուսավոր Հայաստան» խմբակցության պատգամավոր Կարեն Սիմոնյանը, անդրադառնալով վարչապետի հայտարարությանը, դիմեց նրան․ «Ինչպե՞ս եք պատկերացնում՝ սահմանապահներ կանգնեն մի սահմանի վրա, որտեղ հակառակորդը շփման գիծ է պահում, այսինքն՝ խրամատներ է փորում, զորք է պահում»։

Ի պատասխան՝ Նիկոլ Փաշինյանն ասաց․ «Ես, բնականաբար, նկատի ունեմ սահմանապահներ՝ սահմանապահների դեմ։ Մենք ունենք պետական սահմանի այնպիսի հատվածներ, որտեղ ադրբեջանական կողմից սահմանի պահպանությունն իրականացնում են սահմանապահ զորքեր»։