«Հասկանո՞ւմ եք, դուք ԿԳՄՍ նախարարի հետ եք խոսում»․ Դումանյանը՝ լրագրողներին

Այսօր՝ Կառավարության նիստից առաջ, լրագրողները ԿԳՄՍ նախարարի պաշտոնակատար Վահրամ Դումանյանի հետ զրույցում հարցրին՝ արդյոք խուճապային չէ դրությունը՝ պայմանավորված սահմանային իրավիճակով։

«Ա՛յ, հիմա դուք խուճապ եք տարածում, ձեր հարցադրումները, շեշտադրումները, տոնայնությունը խուճապային են»,- պատասխանեց Դումանյանը։

Անդրադառնալով սկանդալային տեսանյութի վերաբերյալ հարցերին՝ նախարարի պաշտոնակատարն ասաց․ «Նվաստացում է, թե նվաստացում չէ, չեմ կարող ասել, ես չեմ տիրապետում այդ նյութին, հասկանո՞ւմ եք, դուք ԿԳՄՍ նախարարի հետ եք խոսում»։

Դումանյանը խոստացավ Կառավարության նիստից հետո պատասխանել լրագրողների հարցերին։

«Բայց մի խնդրանք՝ Կառավարության նիստից հետո հանկարծ ինձ չնկատելու չտաք, թե իբրև ձեր հարցերը սպառված են»,- ասաց նա լրագրողներին։