«Ռազմաքաղաքականության մեջ չկա «էս հողը պատմականորեն էսինչինն է» կռվան». Լևոն Բարսեղյան

«Ասպարեզ» ակումբի խորհրդի նախագահ Լևոն Բարսեղյանը ֆեյսբուքյան իր էջում գրել է. «Քաղաքականության կամ ռազմաքաղաքականության մեջ չկա «էս հողը պատմականորեն էսինչինն է», կամ «քարտեզով՝ էնինչինն է» կռվան։
Քաղաքականության մեջ հողը նրանն է, ով տեր է, վրան կանգնած է, տիրություն է անում, թագավորում է, ծաղկեցնում է հողը։ Մնացածը լիրիկա է, խեղճերի չարազ, կամ ավելի վատ՝ կուտ է, հասարակ ծիրանի կուտ, որ ծակում, միջուկը հանում, շվվացնում էինք։
Իսկ մշակույթում, պատմության մեջ, հուշերում, նարդու ու չալաղաջի զրույցներում իհարկե կա «հողը պատմականորեն էսինչինն է» բնույթի օրատորիկ մոնումենտ, որը, որքան էլ չուզենք, ոչ մի քննության չի դիմանում ռազմաքաղաքական ամենահասարակ քամուն անգամ։
Մարդ կա ամեն օր ասում է «Անին մերն է, Մասիսը մերն է…»։ Լավ է անում, իր իրավունքն է։ Ու դա լիրիզմ է քաղաքական տեսանկյունից, ընդամենը։ Բայց ուրիշն է տերը հիմա։ Մտել ու նվաճել են։ Զոռով, ու միշտ այդպես է։ Լալկան-ուզվորյալի կոնցեպտը հենց փոխվեց խելացի զորավորի կոնցեպտով ուրեմն շանս ունենք գալիք փոխելու։ Չէ՝ մնալու ենք դեղնած քարտեզների ու լոզոտ զրույցների վրա։ Ոչ թե հույսին, այլ՝ վրա»։