«Խոսվում է այն մասին, որ թուրքերն Ադրբեջանում կարող են «Բայրաքթար»-ի արտադրություն հիմնել». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է․ «Խոսվում է այն մասին, որ թուրքերն Ադրբեջանում կարող են «Բայրաքթար»-ի արտադրություն հիմնել: Այդ ծրագրի առանցքային «թիրախն» անշուշտ Կենտրոնական Ասիան է, որտեղ տեսանելի ապագայում թուրքերը թերևս կսկսեն իրենց ավելի ու ավելի ուժեղ ներկայությունը պարտադրել Ռուսաստանին: Եվ ոչ միայն: Իհարկե, նաև Չինաստանին:

Անկարան անկասկած դիտարկելու է ամերիկա-չինական դիմակայության վրա «ռազմաքաղաքական կարողություն» դիզելու հնարավորությունը, լավ զգալով, որ ԱՄՆ չի խանգարելու ընթացքը դեպի կենտրոնասիական ռեգիոն, Չինաստանն էլ փորձելու է պայմանավորվել շահավետ պայմաններով:

Արանքում դարձյալ սեղմվելու են ռուսական տիրույթներն ու այնտեղ գտնվողները, որովհետև Չինաստանը կպայմանավորվի թուրքերի հետ, իսկ ռուսներին կթելադրի պայմաններ:

Էդ իմաստով, արտահայտությունը, թե մենք ունենք հինգ տարի ժամանակ՝ հղում անելով Արցախում ռուս խաղաղապահների տեղակայման ժամկետին, կարծում եմ՝ համարժեք չէ: Մենք ժամանակ չունենք, որովհետև այդ հինգ տարվա առումով ամեն ինչ կարգին է միայն թղթերով, ինչպես Սերժ Սարգսյանը կասեր: Իսկ իրականում, մենք ժամանակ չունենք:

Կբացի՞ Հայաստանի համար շատ թե քիչ կանխատեսելի ժամանակային տարածություն Բայդեն-Պուտին հանդիպումը: Սա հարց է, էական հարց, որի պատասխան այսօր ունենալ չենք կարող: Բայց այն, որ հունիսի 16-ին էլ Էրդողանը որոշել է Ալիևի հետ այցելել Շուշի՝ հենց Բայդեն-Պուտին հանդիպման օրը, խոսում է այն մասին, որ Էրդողանն էլ այդ հանդիպումից ունի մտահոգություն»: