«Ազատ Հայրենիք» դաշինքը հայտարարություն է տարածել

174

Հինգշաբթի, 17 հունիսի, 2021 թ., 13:15

«Ազատ Հայրենիք» դաշինքը հայտարարություն է տարածել. «ԱԶԱՏ ՀԱՅՐԵՆԻՔ դաշինքի խորհուրդը համարում է, որ Հանրային հեռուստաընկերության գործադիր տնօրենի որոշումը՝ մերժել հունիսի 17-ի «Հայաստանն ընտրում է» խորագրով հեռուստաբանավեճում դաշինքի վարչապետի թեկնածու Անդրիաս Ղուկասյանի մասնակցությունը, կոպտորեն խախտում է ընտրություններում մասնակցող քաղաքական ուժերի համար հավասար պայմաններ ստեղծելու սկզբունքը:

Ակնհայտ է, որ ներկայացնելով ձևական փաստարկներ, Հանրային հեռուստաընկերության ղեկավարությունը, նպատակ է հետապնդում ընտրողների կողմնորոշման համար կարևորագույն բանավեճում արհեստականորեն բարենպաստ պայմաններ ստեղծել Նիկոլ Փաշինյանի համար:

ԱԶԱՏ ՀԱՅՐԵՆԻՔ դաշինքը դատապարտում է Հանրային հեռուստաընկերության նման գործելաոճը, և կոչ անում հավատարիմ մնալ Հանրային հեռուստաընկերության գլխավոր առաքելությանը՝ անաչառ լուսաբանել նախընտրական քարոզարշավը: ԱԶԱՏ ՀԱՅՐԵՆԻՔ դաշինքը կրկին տեղեկացնում է Հանրային հեռուստաընկերության ղեկավարությանը, որ հունիսի 17-ի եզրափակիչ բանավեճում դաշինքի կողմից հանդես գալու համար լիազորում է միայն դաշինքի կողմից վարչապետի թեկնածու առաջադրված Անդրիաս Ղուկասյանին։ Մեր այս որոշումն անտեսելով Դուք խախտում եք ընտրական գործընթացի կարևորագույն բանավեճում՝ ԱԶԱՏ ՀԱՅՐԵՆԻՔ դաշինքի իրավահասար մասնակցության իրավունքը, և ԱԶԱՏ ՀԱՅՐԵՆԻՔ դաշինքի նկատմամբ իրականացնում եք խտրական վերաբերմունք»։