«Իրականում հենց իր ժամանակ է Ղարաբաղը դուրս մնացել բանակցային գործընթացից». Ռոբերտ Քոչարյան

«Լևոն Տեր-Պետրոսյանն ասում է՝ Արցախը բանակցային գործընթացից դուրս մղեց Ռոբերտ Քոչարյանը»,- Մարտունիում դիմելով ՀՀ երկրորդ նախագահ Ռոբերտ Քոչարյանին՝ ասաց քաղաքացիներից մեկը՝ խնդրելով պարզաբանել, թե ե՞րբ է Արցախը դուրս մնացել բանակցություններից. «Գործընթաց էր սկսվել 1995-ի վերջին՝ Ժիրայր Լիպարիտյան-Վաֆա Գուլիզադե: Լիպարիտյանը եղել է Լևոն Տեր-Պետրոսյանի խորհրդականը, Գուլիզադեն՝ Ալիևի: Սկսել է մի գործընթաց, որտեղ Ղարաբաղն ընդհանրապես չէր մասնակցում, ու մոտ մեկ տարի հետո այդ բանակցություններն ավարտվեցին նրանով, որ Լիսաբոնում մենք շատ վատ որոշում ստացանք, որը Հայաստանը չստորագրեց ու վետո դրեց: Լիպարիտյանն ընդունեց, որ լավ նպատակով մտել էին գործընթացի մեջ, բայց արդյունքում Ղարաբաղը դուրս մնաց... Ես Հայաստանում նախագահ եմ դարձել 1998-ի ապրիլի 9-ին: Լիսաբոնը եղել է 1996-ի դեկտեմբերին, ու իմ հետ կապել Ղարաբաղի՝ բանակցություններից դուրս թողնելը, առնվազն անբարեխիղճ է... Ինքը փորձում է իմ հետ կապել, բայց իրականում հենց իր ժամանակ է Ղարաբաղը դուրս մնացել բանակցային գործընթացից: Այդ տեսանկյունից իրար նման են. այսօրվա իշխանությունը նույն գործելաոճի մեջ է՝ ինչ-որ մի բան անի, ուրիշների վրա գցի»,- ասաց Ռոբերտ Քոչարյանը: