«Համամի՞տ եք, որ Նիկոլ Փաշինյանը գերազանցեց իր բոլոր նախորդ դավաճաններին»․ ԱԺԲ-ն վերսկսում է փողոցային պայքարը

«Մենք հայերով շատ ենք ասում՝ մինչև դանակը ոսկորին չհասնի, ոտքի կանգնողը չենք։ Համամի՞տ եք, որ Նիկոլ Փաշինյանը գերազանցեց իր բոլոր նախորդ դավաճաններին, համաձա՞յն եք, որ այսօր հայ ազգի համար մեկ թշնամին նա է։ Հանդուրժելո՞ւ եք այս բոլորը, ենթարկվելո՞ւ եք, համակերպվելո՞ւ եք, համաձայնվելո՞ւ եք ռուսացմանը, ընդունելո՞ւ ենք, որ թուրքանալու ենք»,- այսօր, Ազգային ժողովրդավարական բևեռի հանրահավաքին՝ դիմելով մասնակիցներին, ասաց ԱԺԲ խորհրդի անդամ Ժիրայր Սեֆիլյանը։

«Հերթական պայքարի մեջ ենք մտնում, սիրելի ժողովուրդ, պիտի պատրաստվենք՝ ամեն կերպ, և ձեր հետ միասին պիտի որդեգրենք այնպիսի մարտավարություն, որ բոլորի համար հստակ լինի։ Առաջիկա պայքարին մենք որդեգրել են այնպիսի մեթոդ, որը քաղաքացիական անհնազանդության մեթոդն է»,- ասաց Ժ․ Սեֆիլյանը՝ նշելով, որ այսօրվանից վերսկսում են փողոցային պայքարը։