Հղի կնոջ մահից հետո Լեհաստանում կրկին ցույցեր են՝ աբորտի արգելքի դեմ

Լեհաստանում 30-ամյա հղի կին է մահացել, քանի որ բժիշկները հրաժարվել են հեռացնել պտուղը՝ աբորտի հետ կապված օրենքի խստացման պատճառով։ Այս դեպքից հետո սկսվել են բողոքի ցույցեր Վարշավայում, Կրակովում և այլ քաղաքներում. մարդիկ մոմեր են վառել հանգուցյալի հիշատակին, հայտնում է The Associated Press-ը։

Իզաբելան հոսպիտալացվել է հղիության 22-րդ շաբաթում ամնիոտիկ հեղուկի արտահոսքի պատճառով: Հիվանդանոցում բժիշկները հաստատել են, որ պտուղը բնածին արատներ ունի։ Արդյունքում պտուղը մահացել է, իսկ կնոջ մոտ սեպտիկ շոկ է սկսվել։ Նա մահացել է ջրահեռացումից 24 ժամ անց: Փաստաբանի խոսքով՝ բժիշկները գործել են նոր օրենքի շրջանակներում, ըստ որի՝ անհնար է հղիությունն ընդհատել, եթե անգամ պտուղն ունի անբուժելի հիվանդություններ։ Բժիշկները պնդել են, որ հոգ են տարել հիվանդի և պտղի առողջության և կյանքի համար:

Ցուցարարներն այժմ պահանջում են փոխել հղիության արհեստական ​​ընդհատման մասին օրենքը: Երկրի մի շարք խոշոր քաղաքներում մարդիկ շարունակում են փողոց դուրս գալ՝ քննադատելով երկրում իշխող «Օրենք և արդարություն» կուսակցությանը:

Հիշեցնենք, որ մեկ տարի առաջ Լեհաստանում նոր օրենք է ընդունվել։ Աբորտի արգելքի դեմ ցույցերն սկսվել էին, երբ հոկտեմբերի 22-ին Սահմանադրական դատարանը որոշել էր, որ պտղի պաթոլոգիայի պատճառով հղիության արհեստական ​​ընդհատումը հակասում է երկրի հիմնարար օրենքին։ Սակայն հասարակության մեջ անկարգությունների և հազարավոր բողոքների պատճառով իշխանություններն այն ժամանակ հետաձգեցին արգելքի որոշման՝ ուժի մեջ մտնելը, մինչև դատարանը չներկայացնի իր դատավճռի պաշտոնական հիմնավորումը։ Դրանից հետո Լեհաստանում պտղի պաթոլոգիայի պատճառով աբորտը պաշտոնապես արգելվեց։