Իսպանիայում առգրավել են ավելի քան 2 հազար տարի առաջ պատրաստված իբերիական թուր

Իսպանիայի ոստիկանությունը առգրավել է ավելի քան 2 հազար տարի առաջ պատրաստված իբերիական ֆալկատա թուր, որը վաճառվել է առցանց աճուրդով։ Այս մասին հայտնում է The Guardian-ը։

Աղբյուրը հաղորդում է, որ պեղումների ժամանակ հայտնաբերված ավելի քան 200 իրերի հավաքածու է հանվել վաճառքի, մասնավորապես՝ նետերի սլաքներ, զարդեր, կերամիկայի կտորներ։

«Ոստիկանները երկար հետաքննությունից հետո հայտնաբերել են թուրը վաճառքի հանած մարդուն։ Նա Իսպանիայի քաղաքացի է»,- ասվում է ոստիկանության հաղորդագրության մեջ։

Ոստիկանությունը հավելել է, որ սուրը և այլ արտեֆակտներ առգրավվել են, իսկ վաճառողը ձերբակալվել է հնագիտական ​​գտածոների վերաբերյալ օրենսդրությունը խախտելու մեղադրանքով:

Թուրը պատկանել է իբերիացի մարտիկին, այն պատրաստվել է մ.թ.ա. 5-3 դարերում, այսինքն, նախահռոմեական ժամանակներում։

Ֆալկատաները՝ որպես անձնական զենք, սովորաբար դրվել են տիրոջ գերեզմանում՝ սայրը նախապես կոտրելով։ Սակայն այս գտածոն ամբողջական է, ինչի շնորհիվ այն արժեքավոր է ու եզակի: