«Գործ ունեք ռուսական, իսկ իրականում՝ թուրքական օրակարգ առաջ մղողների հետ». Հայկ Մարտիրոսյան

Քաղաքագետ Հայկ Մարտիրոսյանի գրառումը. «Հենց տեսնում կամ լսում եք մեկին, որ խոսում է Հայաստանի՝ Թուրքիայի հետ «ուղիղ խոսելու» մասին, որ «այլք, օրինակ, Ռուսաստանը Հայաստանի անունից չխոսի», իմացեք՝ գործ ունեք հենց ռուսական, իսկ իրականում՝ թուրքական օրակարգ առաջ մղողների հետ:

Դավաճանությունն այսօր մեզանում հայրենասիրական, մտահոգ և իրատեսական պատմուճանով է հանդես գալիս, բայց իրականում անհայրենիք, Հայաստանի քանդման մասին միայն հոգացող ու տրամաբանության առումով անիրատես գիծ է առաջ տանում:

Թուրքիայի հետ որևէ երկխոսություն՝ միջնորդավորված թե հատկապես ուղիղ, ոչ թե նախաձեռնության սեփական ձեռքերում ստանձնում է նշանակում, այլ Թուրքիայի կողմից Հայաստանի վրա իրականացվող և իրականացվելիք ճնշումների լիակատար բավարարում: Հատկապես ուղիղ ճնշումների պարագայում Հայաստանի համար վիճակը դառնալու է անելք, իսկ հուսալ, թե ուղիղ շփման ժամանակ հնարավոր կլինի սեփական դիրքերը պահել՝ ոչ միայն միամտություն է, այլև հստակ դավաճանական գծի քարոզ:
Երբ երկրի ու հասարակության մեջ կա մի շոշափելի խումբ ակամա դավաճաններ ու նաև կամա՝ գիտակից դավաճաններ, աքսիոմատիկ ճշմարտությունները դառնում են կեղծորեն վիճարկելի: Չնայած դրան՝ ճշմարտությունը մեկն է, իսկ պայքարը հանուն դրա՝ սկսվում է կեղծիքի քարոզի դեմ արշավով:

Ճանաչե՛նք դավաճաններին: Նրանք քարոզում են «Թուրքիայի հետ ուղիղ խոսել, որպեսզի այլոց զրկենք մեր փոխարեն դա անելուց» մինչդեռ իրականում ասում են. «Ուղիղ խոսենք Թուրքիայի հետ, որպեսզի մանևրելու տեղ անգամ չունենանք՝ ուրիշների փոխանցածը կամ շահերը մերժելու միջոցով, այլ ուղղակի մտնենք թուրքական մամլիչի տակ և բանակցենք լիակատար հանձնվելու ու մեռնելու ձևերի մասին միայն»»: