«Կա՞ մարդ, որը հավատում է, որ ԱԱԾ-ում այս գործը պատշաճ կքննվի». Դանիել Իոաննիսյան

ԻՔՄ համակարգող, Հանրային խորհրդի անդամ Դանիել Իոաննիսյանը ֆեյսբուքյան իր էջում գրել է. «Մի պատմություն՝ կռվարար ՔՊ-ական պատգամավորների ու կառավարության չեկիստական հակումների մասին
Ազգային ժողովում ՔՊ-ական պատգամավորների ու ՀՅԴ-ական օգնականների ծեծկռտուքի դեպքը քննում է ԱԱԾ-ն, որը, ֆորմալ ու ոչ ֆորմալ առումներով, ենթարվում է կառավարությանը: Կա՞ մարդ, որը հավատում է, որ ԱԱԾ-ում այս գործը պատշաճ կքննվի: Հազիվ թե:
Բարձրաստիճան պաշտոնյաների ոչ կոռուպցիոն հանցագործությունների քննությունը ԱԱԾ-ին վերապահելը Ռուստամ Բադասյանի ժամանակ կառավարության մտքի թռիչքն է, որն արվեց գաղտագողի (օրենքը երկրորդ ընթերցմամբ քննարկելուց մի քանի օր առաջ նախագիծը փոփոխելով):
Մի շարք ՀԿ-ներ (այդ թվում՝ «Իրազեկ քաղաքացիների միավորումը») վերջերս պահանջեցին, որ դա փոխվի: Ձեր խոնարհ ծառան հակակոռուպցիոն քաղաքականության խորհրդի նիստում հնչեցրեց այդ առաջարկ/պահանջը և վարչապետ Նիկոլ Փաշինյանի նախաձեռնությամբ ստեղծվեց աշխատանքային խումբ (որը պետք է քննարկեր այս և այլ հարցեր):
Աշխատանքային խմբում հարցը քննարկվեց, որոշվեց, որ բարձրաստիճան պաշտոնյաների ոչ կոռուպցիոն հանցագործությունները պետք է քննի Քննչական կոմիտեն (որը, օրենքի համաձայն, անկախ է կառավարությունից): Արդարադատության նախարարությունը պատրաստեց օրենքի համապատասխան նախագիծը: ... Բայց դա տևեց մի քանի օր, որից հետո նախագիծը փոխվեց ու կրկին նախատեսվեց, որ այդ գործերը պետք է քննի ԱԱԾ-ն: Ի հեճուկս մեր պահանջների՝ նախագծի փոփոխության որևէ հիմնավորում չեկավ:
Ակնհայտ է դառնում, որ կառավարությունում ուզում են, որ բոլոր պրոցեսները (այդ թվում՝ ՔՊ-ական կռվարար պատգամավորներին պատժել-չպատժելը) որոշվեն վարչապետին ուղղակիորեն ենթարկվող և փակ ԱԱԾ-ում»: