«Պատերազմի մասնակից, սխրանքներ գործած մարդուն, դատավորին ասում են՝ թմբուկ զարկող»․ Վ․ Ալեքսանյան

«Ուզում եմ խոսել մեր ընդդիմության կողմից գեներացվող դիսկուրսի մասին, հատկապես դատավորների ու արդարադատության համակարգի շուրջ»,- այսօր՝ ԱԺ նիստի ժամանակ, հայտարարեց ՔՊ-ական պատգամավոր Վահագն Ալեքսանյանը:

«Մեր ընդդիմությունը, ասում է՝ կան դատավորներ, որոնք տականք են, և կան դատավորներ, ովքեր անկախ, փառահեղ ու պանծալի կերպարներ են: Բայց այդ ամենը մեր ընդդիմության տրամաբանությամբ, պայմանավորվում է նրանով, որ եթե մի դատավորը կալանքի որոշում է տվել իրենց գործընկերներից, ընկերներից մեկին, տականք է, մյուս դատավորը, որ կալանքի որոշում է տվել ինչ-որ մի գործով մի վկայի, էդ դատավորը պանծալի մի մարդ է, և պետք է գնալ ցույցեր անել, որ նրա տված կալանքի որոշումը չքննվի»,-նշեց նա:

«Պատերազմի մասնակից, ջոկատի հրամանատար կամ հրամանատարի տեղակալ, սխրանքներ գործած մարդուն, դատավորին ասում են՝ թմբուկ զարկող: Մարդիկ կան, ես կարծում եմ՝ իրենց գլուխներն են առհասարակ թմբուկի տեղ օգտագործում»,- հավելեց Ալեքսանյանը։