«Հնարավոր չէ՞ր ժամանակավորապես հանել մաքսատուրքը պարարտանյութերի վրայից»․ Արման Վարդանյան

Ռեժիսոր Արման Վարդանյանի գրառումը․ «Սուտլիկ որսկանների» ժամանակակից արկածները։
Կառավարության որոշմամբ, պետության կողմից, գյուղատնտեսին 9000 դրամի չափով, պարարտանյութի զեղչ տրամադրելու մասին։
Պարարտանյութերի գինը հայկական շուկայում թանկացել է 60- 70% -ով։ Նախկինում 6000-7500 դ․ վաճառվող մի պարկ պարարտանյութը դարձել է 24-25 հազար դրամ։
Հիմա, ըստ այդ որոշման, գյուղատնտեսն իր հողի սեփականության վկայականով գնում է գյուղապետարան, որտեղ հեկտարի չափով տրամադրվում է այդ աջակցությունը։
Տալիս են 15 կազմակերպության անուն և հեռախոսահամարներ, ասում են՝ ընտրի, զանգի պայմանավորվի ներկրողի հետ, մենք պարկի դիմաց 9000 դրամ աջակցությունը կփոխանցենք ներկրողին։
Կթվա՝ ինչ լավա, կառավարիչներ՝ Հադի, Հյուդի, Չատի, Մատին ու Պապան մի քաջ ու ազնիվ բանիմաց տղերք։
Պարզվում է, որ այդ կազմակերպությունները խուսափում են այդ գործարքից, քանի որ հայտնի չէ, երբ փողը կնստի իրենց հաշվին և այդ պահին պարարտանյութերի գինը, ինչքան կլինի։
Ժամանակն էլ վարար գետի նման, թշնամաբար գնում է։
Ստացվում է «Անտակ պղինձը, մեջը ածինք բադն ու բրինձը, անկրակ եփեցինք։ Եփեց, եփեց, միսն ու բրինձը գնացին, մնաց ջուրը»։
Իմ ունեցած տեղեկություններով՝ Վրաստանում 1 պարկ Ազոտական պարատանյութի գինը 5000 դ-ի սահմաններում է, մաքսատուրքը նույնպես, մոտավոր 5000 դ-ի սահմաններում, գնալ բերելով, Թիֆլիս խինկալի ուտելով՝ 13000 դրամ։
Հիմա հարց․ հնարավոր չէ՞ր մեկ ամսով որոշում կայացնել՝ ժամանակավորապես հանել մաքսատուրքը պարարտանյութերի վրայից, մարդիկ գնային, խինկաի ուտեին, առնեին, բերեին, խելամիտ գնով հողը մշակեին։
Գրողը Տանի»։