«Ով պատերազմի որ դրվագին ծանոթ է, համարում է, թե ծանոթ է ամբողջ եղելությանը»․ Հակոբ Բադալյան

Քաղաքական մեկնաբան Հակոբ Բադալյանի գրառումը. «ԱԱԾ նախկին պետը, որ նշանակվեց պատերազմի օրերին և աշխատեց մի քանի ամիս, ասում է, թե ինքը չուներ տեղեկություն, որ Ադրբեջանի թիրախը Շուշին է, իր համար դա նորություն է: Հասկանալի է, հարցը հնչել է Փաշինյանի հայտարարությունների համատեքստում և դրանից էլ գալիս է պատասխանը:
Այդ պատասխանը ծիծաղելի կլիներ, եթե չվերաբերեր ազգային անվտանգության կարևորագույն հարցերին: Կարևորագույն հարց, ինչպիսին հակահետախուզությունն է: Հակահետախուզությունը պետք է աշխատի, որպեսզի ԱԱԾ պետն իմանա, որ Ադրբեջանի ռազմական սցենարներում Շուշին ևս թիրախների շարքում է:
Շուշին հանձնվել է, դավաճանվել է, գործարք է եղել, ով է դավաճանել, ով է փախել, ով չի փախել, սա հարցի մի կողմն է, որի վերաբերյալ տարբեր խոսակցություններ կան, որոնց չեմ ուզում անդրադառնալ՝ ինչպես ասում են, որևէ պատերազմի ամենաառաջին զոհերից մեկը լինում է ճշմարտությունը: Ով պատերազմի որ դրվագին ծանոթ է, համարում է, թե ծանոթ է ամբողջ եղելությանը: Չիմանալով, ընդամենը այս կամ այն դրվագին տիրապետող անձանց խոսակցություններ լսելով՝ չեմ ուզում մտնել այդ դաշտ:
Բայց, ինչպե՞ս կարող է Ադրբեջանն ունենալ Արցախի հանդեպ ռազմական ագրեսիայի ծրագրեր՝ իսկ նախկին ԱԱԾ պետի համար «հուսամ» գոնե այդ ծրագրերը նորություն չեն եղել, ու այդ շարքում չլինի Շուշին: Կամ, աչքով տեսնելով, որ Ադրբեջանն ունի ագրեսիայի մտադրություն, համոզված չլինել, որ Շուշին էլ է լինելու թիրախ, Ստեփանակերտն էլ, փոքր Արցախի յուրաքանչյուր կտորն էլ: Սրա համար նույնիսկ հակահետախուզություն պետք չէ, սրա համար պետք է պարզ տրամաբանություն և նվազագույն պրոֆեսիոնալիզմ:
Չեմ կասկածում, որ ԱԱԾ նախկին պետը ունի դա, պարզապես հիմա մի կողմ է դրված և առաջնահերթը քաղաքական հայացքի և համակրանքի հարցն է, ու հանուն դրա կարելի է հրապարակավ հնչեցնել անգամ անտրամաբանական պատասխաններ»: