Սպիտակ տունը չի բացառել այս շաբաթ Ռուսաստանի դեմ նոր պատժամիջոցների սահմանումը

ԱՄՆ-ը դիտարկում է Ռուսաստանի դեմ նոր պատժամիջոցներ կիրառելու հարցը, ասել է Սպիտակ տան մամուլի քարտուղար Ջեն Փսաքին՝ ի պատասխան այն հարցին, թե արդյոք այս շաբաթ Մոսկվայի նկատմամբ սահմանափակումներ կկիրառվեն։ Մամուլի քարտուղարի խոսքերը Twitter-ում մեջբերել է Bloomberg-ի լրագրող Ջենիֆեր Ջեյքոբսը։

Փսաքիի խոսքով՝ Միացյալ Նահանգների վարչակազմը «սկսում է լրացուցիչ պատժամիջոցներ սահմանելու գործընթացը», և «դրանցից մի քանիսը քննարկման փուլում են»։

Նախօրեին՝ ապրիլի 18-ին, ԱՄՆ ֆինանսների փոխնախարար Ուոլլի Ադեյեմոն ասել էր, որ պատժամիջոցների հաջորդ փաթեթի նպատակը կլինի «ռուսական ռազմական մեքենան մաս-մաս անելը, ներառյալ՝ ռազմարդյունաբերական համալիրի և դրա մատակարարման շղթաների սահմանափակումները»:
Պաշտոնյան նշել է, որ Ռուսաստանին անհրաժեշտ կլինեն զինամթերքի և զենքի նոր մատակարարումներ, և այդ կապակցությամբ Վաշինգթոնը կփորձի «զրկել Ռուսաստանին անհրաժեշտ կարևոր ռեսուրսներից»: