«Մեր տղաներին գիտակցված սպանության ուղարկողները պետք է պատասխան տան». Գեղամ Նազարյան

ԱԺ «Հայաստան» խմբակցության պատգամավոր Գեղամ Նազարյանը, որի որդին զոհվել է 44-օրյա պատերազմում, Ֆրանսիայի հրապարակում ընթացող հանրահավաքին զոհված զինծառայողների անունից պահանջեց, որ իշխանափոխությունից հետո արդարադատություն իրականացվի և իրենց տղաներին մահվան բերան տարածները պատժվեն։

«Երբ որ մեր երկրի թիվ մեկ աթոռն ազատվի այն չարիքից, որով պատված է, խոստացեք, որ ով էլ լինի վարչապետ, մենք հիշեցնելու ենք, որ մեր տղերքը պահանջում են վրեժ, արդարադատություն։ Որ նրանք, ովքեր մեր տղաներին ուղարկեցին գիտակցված սպանության, անպայման պատասխան տան, որ այլևս մեր սուրբ երկրում չհայտնվի մեկը, որ հայտարարի, թե ես կարող էի փրկել բոլորի կյանքերը, բայց որոշեցի, որ գնան, զոհվեն։ Խոստացեք, որ էդ արդարադատությունը լինելու է, թե չէ այստեղ մեր կանգնելը գրոշի արժեք չունի»,– ընդգծեց Գեղամ Նազարյանը։

Նա նաև ոստիկաններին հորդորեց, որ նրանք Նիկոլ Փաշինյանի՝ վախից դրդված հրամանները չկատարեն։

«Ուժ չփորձեք կիրառել, դուք ուսադիրներ ունեք և պարտավոր եք հրաման կատարել, բայց առաջինը կատարեք երկնքում գտնվող մեր հերոս տղաների հրամանը»,– հավելեց Գեղամ Նազարյանը։