«Նիդերլանդները կշարունակի պայքարել հայ գերիների վերադարձի համար». Մարկ Ռուտե

Նիդերլանդները կշարունակի պայքարել, որպեսզի հայ գերիներն Ադրբեջանից ապահով վերադառնան հայրենիք, այս մասին Հայաստանի վարչապետ Նիկոլ Փաշինյանի հետ մամուլի ասուլիսի ժամանակ հայտարարել է Նիդերլանդների Թագավորության վարչապետ Մարկ Ռուտեն։

«2020-ի աղետալի պատերազմը բոլորիս համար պարզ դարձրեց, որ վերջնական խաղաղությունը շատ կարևոր է: Դրա համար էլ այդքան ուրախ ենք, որ Հայաստանի վարչապետի կողմից ինտենսիվ երկխոսություն է տեղի ունենում Ադրբեջանի հետ»,- ասել է նա։

Մարկ Ռուտեն կարծիք է հայտնել, որ տևական խաղաղությունն իրագործելի է, և Հայաստանն ու Ադրբեջանը միայն այդ տևական խաղաղության պայմաններում կարող են տարածաշրջանում ապրել: Նրա խոսքով՝ Ուկրաինայի պատերազմը ևս իր ազդեցությունն ունի Մինսկի խմբի 3 համանախագահների վրա: