«Ադրբեջանը չեղած տեղից սփյուռք է «սարքում», մենք եղածը վերածում ենք «ներքին ռազբորկաների» կցորդի»․ Հակոբ Բադալյան

Քաղաքական մեկնաբան Հակոբ Բադալյանի գրառումը. «Այն, որ միարժեք դատապարտելի է Հայաստանի պաշտոնյաների դեմ սփյուռքում կազմակերպվող՝ մարդկային ու քաղաքական էթիկայի բոլոր նորմերն անցնող որևէ ակցիա, քննարկելու հարց չէ անգամ:
Բայց, ի՞նչ հարց ենք լուծում, օրինակ, Մուրադ Փափազյանի մուտքն արգելափակելով, եթե խնդիրն այդտեղ է: Բացարձակապես ոչ մի: Թեև, մի հարց, իհարկե, լուծվում է՝ հայաստանյան «կռիվ-կռիվը» մենք հասցնում ենք համահայկական մասշտաբի:
Եթե մենք դնում ենք այդպիսի հարց՝ պետական արձագանք պետական ինստիտուտների հանդեպ անվայել վարքագծին, ապա այդ դեպքում արձագանքը պետք է դարձնել իրապես պետական, ինստիտուցիոնալ և սահմանել, որ Հայաստանի պետական որևէ ինստիտուտ կամ խորհրդանիշ վիրավորողը չի կարող մուտք ունենալ Հայաստան՝ անկախ ազգությունից: Ամրագրենք դա օրենքով, սահմանենք չափանիշները և շարժվենք առաջ:
Այդ դեպքում օրինակ պատկերացնելի է, թե քանի տասնյակ «ով», «յով» և «յան» ազգանուններով անձինք Հայաստան մուտքի արգելքից կզրկվեն միայն Ռուսաստանից:
Այլապես, էս «կռիվ-կռիվը» պետք է կանգնեցնել և որքան էլ դրա «տոնը» տալիս է ընդդիմությունը, պետությունը պետք է գտնի իր պատասխաններով առավել բարձր որակի վրա գտնվելու կարողություն, որպեսզի չարդարանա նաև հայաստանյան «կռիվ-կռիվը» սփյուռքյան սեգմենտ տեղափոխելու ընդդիմության մարտավարությունը, եթե կա այդպիսին:
Ադրբեջանը չեղած տեղից սփյուռք է «սարքում», մենք եղածը վերածում ենք «ներքին ռազբորկաների» կցորդի:
Հ.Գ. կրկնեմ, և խնդրում եմ մեկնաբանություններում չծավալվել, թե ՀՅԴ-ն, ընդդիմությունը, մյուսը, մյուսը: Էդ ամենը պարզ է, և կարելի է հազար տարի ասել էդ ամենը և այդ կերպ բացատրել կամ արդարացնել համանման պատասխանները: Պետական վերնախավի հատկանիշը պետք է լինի պատասխանների վերընթաց որակի հասնելը, որ ունենանք ոչ թե պարբերական «դարձ իր շրջան», այլ անիվի պտույտ դեպի առաջ»: