«Jamaz.info և Miq.az կայքերի խմբագիրները կալանավորվել են». Տաթևիկ Հայրապետյան

ԱԺ նախկին պատգամավոր Տաթևիկ Հայրապետյանի գրառումը. «Ադրբեջանի Գլխավոր դատախազությունը հայտարարություն է տարածել հետևյալ բովանդակությամբ. «Վերջին օրերին սոցիալական ցանցերի որոշ օգտատերեր տարածում են տեղեկատվություն՝ ադրբեջանական բանակի համբավը խաթարելու, քաղաքացիների շրջանում արհեստական իրարանցում ստեղծելու, ինչպես նաև պետության պաշտպանունակության ամրապնդման ուղղությամբ տարվող աշխատանքները խափանելու նպատակով: Հասարակական-քաղաքական կայունության, մարդու և քաղաքացու իրավունքների ու ազատությունների խախտմանն ուղղված դեպքերը կանխելու համար Գլխավոր դատախազություն են հրավիրվել այնպիսի գործողություններ թույլ տված անձինք»:

Նշեմ, որ դրանց շարքում են «jamaz.info» կայքի գլխավոր խմբագիրը, «miq.az» կայքի խմբագիրը և որոշ ակտիվ օգտատերեր, որոնցից մեկը՝ Թոֆիգ Շահմուրադովը, մեկ ամսով կալանավորվել է:

Առաջին հայացքից ոչ այնքան կարևոր այս տեղեկատվությունը գալիս է փաստելու, թե ինչ հետևողական են մեր հակառակորդ հարևանները բանակի հանդեպ որևէ տեղեկատվության տարածման նկատմամբ: Ավելին, նրանք փակում են բանակի մասին որևէ տեղեկատվության տարածման այլընտրանքային հնարավոր աղբյուրները:

Ստուգեցի որոշ օգտատերերի գրառումներ, մասնավորապես արդեն կալանավորված անձի ՖԲ էջը: Վերջինս գերազանցապես տարածում է պաշտոնական տեղեկատվություն, տեղ-տեղ խոսում է որոշ գեներալների կոռումպացվածության մասին, որևէ թթու խոսք չկա Իլհամ Ալիևի հասցեին, առնվազն ես դա չեմ նկատել: Բայց անգամ այդ պարագայում անձը կալանավորվել է իր գործունեության համար: Սա, իհարկե, ադրբեջանական բռնապետական վարչակարգի դեպքում սովորական երևույթ է:

Այդուհանդերձ, մի պահ հայացք նետելով մեզ մոտ բանակի մասին տարածվող լուրերին, հասկացա, որ շատ լավ կլիներ, եթե գրողները, ընդ որում՝ առաջին հերթին՝ պաշտոնական աղբյուրները գիտակցեին բանակի համբավի կարևորությունը: Խոսքը իրականությունը թաքցնելու մասին չէ, այլ ամեն բառ ու լուր կշռադատելու, երբեմն մեր հակառակորդի աչքով նայելու անհրաժեշտության մասին:

Եթե շատերը գիտակցեին, որ բանակի կամ զինվորականության մասին իրենց ասածները կարող են դառնալ զենք ադրբեջանական քարոզչամեքենայի ձեռքին, գոնե մի քիչ երկար կմտածեին խոսելուց առաջ»: