«Ինչպե՞ս են Ադրբեջանում արձագանքել Հայաստան՝ ԵՄ քաղաքացիական առաքելություն ուղարկելուն». ադրբեջանագետ

ԱԺ նախկին պատգամավոր, ադրբեջանագետ Տաթևիկ Հայրապետյանը ֆեյսբուքյան իր էջում գրում է. «Ինչպե՞ս են Ադրբեջանում արձագանքել Հայաստան՝ ԵՄ քաղաքացիական առաքելություն ուղարկելուն
Դեռ անցած տարվա վերջին Ալիևին շատ բացասական էր արտահայտվում ԵՄ քաղաքացիական առաքելության ժամկետի երկարաձգման մասին խոսակցություններին: Հասկանալի է, թե ինչու: Դա բարդացնում է ագրեսիայի գնալու հնարավորությունները Ադրբեջանի համար: Երեկվանից ադրբեջանական մեդիա դաշտը հրապարակումներ է անում այդ թեմայով՝ մի քանի հետաքրքիր շեշտադրումներով: Նրանք փորձում են ԵՄ քաղաքացիական առաքելության ուղարկումը ներկայացնել որպես հակառուսական, հակաթուրքական և հակաիրանական ակցիա: Նրանց նյարդայնացնում է, թե ինչու Մոսկվան ու Թեհրանը կոշտ գնահատականներ չեն տալիս ԵՄ նման ակտիվությանը: Այստեղից կարելի է եզրակացնել, որ ինտենսիվ դիվանագիտական աշխատանք են տանում նման արձագանքների հասնելու համար: Կարևոր է, որ հայկական կողմը ճիշտ կոմունիկացնի ԵՄ քաղաքացիական առաքելության ներկայությունը Ռուսաստանի և Իրանի հետ՝ հետագա խնդիրներից խուսափելու համար: Վստահ եմ, որ Ադրբեջանը ամեն ինչ անելու է մեզ համար խնդիրներ ստեղծելու համար:
Ուշագրավ է, որ Ադրբեջանը շատ ինտենսիվ համագործակցում է ԵՄ–ի հետ, բայց դա չգիտես ինչու իրենց համար հակառուսական կամ հակաիրանական չէ՞: Հակաիրանական չէ՞ նաև Իսրայելի մուտքը ու դիրքավորումը Իրանի քթի տակ: ԵՄ քաղաքացիական առաքելության ուղարկման վերաբերյալ Ադրբեջանի նյարդային արձագանքները գալիս են փաստելու, որ նրանք նոր ագրեսիայի գնալու մտադրություններ ունեն և դա համարել են խանգարող հանգամանք:
Ինչ վերաբերում է այն հարցին, թե կկանխի՞ արդյոք ԵՄ առաքելության ներկայությունը ադրբեջանական ագրեսիան, ըստ իս՝ կնվազեցնի հնարավորությունները, բայց կանխելու համար մեզ ուժեղ ու մարտունակ բանակ է պետք, որպեսզի Ադրբեջանը չգնա նման արկածախնդրության: ԵՄ առաքելության ուղարկումը կարևոր է, բայց սա բացառիկ ժամանակ է մեզ համար, ամեն օրը թանկ է, ես կասեի՝ անգին: Իշխանությունները չպետք է այս երկու տարին վատնեն անգործ նստելով, որ հետո ասեն՝ մեզ թվաց ԵՄ–ն չի թողի Ադրբեջանը հարձակվի: ԵՄ քաղաքացիական առաքելությունը նման պատասխանատվություն չի վերցրել իր վրա»: