Արամ Գասպարյանը գրավի դիմաց ազատ արձակվեց

ԶՊՄԿ անվտանգության դեպարտամենտի նախկին ղեկավար Արամ Գասպարյանը գրավի դիմաց ազատ արձակվեց «Վարդաշեն» ՔԿՀ-ից։ «Վերաքննիչ դատարանն իրականացրեց արդարադատություն: Դժվա՞ր է այսօր դա իրականացնել, այո՛, դժվար է: Արամ Գասպարյանը 550-ից ավելի օր կալանավորված է եղել, առողջական վիճակն այնպիսին չի, ինչ՝ մինչ կալանավորումն էր: Իսկապես, շատ մեծ փորձություններով անցավ: Այսօր Արամ Գասպարյանի ծննդյան օրն է՝ 50-ամյակը: Արդարադատությունը նման պայմաններում ավելի արժեքավոր է դառնում»,- լրագրողների հետ զրույցում ասաց փաստաբան Արամ Վարդևանյանը:

Հիշեցնենք, որ 2021 թվականի հուլիսի 14-ին ԱԱԾ աշխատակիցները «Զանգեզուրի պղնձամոլիբդենային կոմբինատ»-ից բերման էին ենթարկել Արամ Գասպարյանին: Հուլիսի 16-ին դատարանը նրան մեկ ամսով կալանավորելու որոշում էր կայացրել, ինչից հետո նա գրավի դիմաց ազատ էր արձակվել, որոշ ժամանակ անց Գասպարյանը կրկին կալանավորվել էր։