«Մեր խնդիրն է չդառնալ մանրադրամ Ռուսաստանի ու հավաքական Արևմուտքի բախման գործընթացում»․ Նորիկյան

«Արդար Հայաստան» կուսակցության նախագահ Նորայր Նորիկյանը ֆեյսբուքյան իր էջում գրել է. «Լաչինի միջանքն այս պահի դրությամբ բացված չէ, ինչը նշանակում է, որ Ադրբեջանը ոչ միայն թքած ունի Արդարադատության միջազգային դատարանի կողմից կայացված դատական ակտի վրա, այլև բավարար չի համարում Արցախի կողմից իրականացված երկու կարևորագույն զիջումները, այն է՝ Կաշենի հանքավայրի փակումն ու պետական նախարարի պաշտոնանկությունը։
Ինձ համար պարզից էլ պարզ է, որ ինչպես Արցախի հակամարտության խնդիրը, այնպես էլ Հայաստան-Ադրբեջան հարաբերությունների կարգավորումը դարձել է աշխարհաքաղաքական շահերի գլոբալ բախման օբյեկտ։
Այս իրադրության պայմաններում ակնհայտ է, որ այս կոնֆլիկտի լուծման հեռանկարն ավելի մշուշոտ է, քան պատերազմից առաջ։
Աշխարհաքաղաքական առումով Ռուսաստանը տարածաշրջանից մինչև վերջ չի հեռացել, իսկ Արևմուտքն էլ մինչև վերջ չի եկել, իսկ վերջիններիս միջև ընթացող գլոբալ հակամարտության պայմաններում, երբ տարածաշրջանում չկա հակամարտության կարգավորման կոնսենսուս, գրեթե բացառված է, որ այս հարցում տեղի ունենա ԲԵԿՈՒՄ․․․
Մեր խնդիրն է չդառնալ մանրադրամ Ռուսաստանի ու հավաքական Արևմուտքի բախման գործընթացում․․․»: