«Երիտասարդների զգալի մասը համոզված է եղել, որ մեթամֆետամինը կախվածություն չի առաջացնում». Խամոյանն ահազանգում է

«Համացանցով վաճառվող թմրանյութերը սինթետիկ թմրանյութեր են. ամենատարածվածը մեթամֆետամինն է՝ երիտասարդության շրջանում ամենաշատ իրացվողը»,- ԱԺ հայտարարությունների ժամին ասաց «Հայաստան» խմբակցության պատգամավոր Ագնեսա Խամոյանը՝ հորդորելով ծնողներին զգոն լինել:

«Մասնագետների, հոգեբանների հետ զրույցները ցույց են տալիս, որ իրազեկման լրջագույն բացեր ունենք: Սինթետիկ թմրանյութ օգտագործող երիտասարդների զգալի մասը համոզված է եղել, որ օրինակ, մեթամֆետամինը կախվածություն չի առաջացնում: Դա այդպես չէ, սիրելի երիտասարդություն, այս սինթետիկ թմրամիջոցը համարվում է ամենաբարձր հոգեխթանիչը, և դրա օգտագործումը վնասում է գլխուղեղն ու ֆիզիկական ծանր հետևանքներ առաջացնում»: