«Պետք է զանգեր կատարել էսկալացիան կանխելու համար, ոչ թե հետո, երբ Ադրբեջանը գնա գործողությունների». Տաթևիկ Հայրապետյան

ԱԺ նախկին պատգամավոր, ադրբեջանագետ Տաթևիկ Հայրապետյանը թելեգրամյան իր էջում գրում է. «Ավելի քան ակնհայտ է, որ Ադրբեջանը փորձում է գնալ նոր էսկալացիայի: Իրավիճակն ամենից շատ լարում են արցախյան ուղղությամբ, բայց դա նաև չի բացառում գործողություններ ՀՀ–ի ուղղությամբ: Սա պարզ իրողություն է, որն արձանագրվել է նաև ՀՀ վարչապետի ու ԱԳՆ–ի կողմից: Միջազգային փաստահավաք առաքելություն ուղարկելու կոչերը լավ են, բայց դա երկար գործընթաց է, իրավիճակը ժամ ժամի լարվում է ու անհրաժեշտ են հրատապ քայլեր:

Ի՞նչ անել:
Փաշինյանը կարող է զանգեր կատարել Մոսկվա, Վաշինգթոն, Բրյուսել և նաև Թեհրան: Այս բոլոր կողմերը ցանկանում են և անգամ մրցակցում միմյանց միջև հայ–ադրբեջանական հարաբերություններում միջնորդ լինելու համար: Թող հենց հիմա իրենց կանխարգելիչ քայլերով ցույց տան, թե իրենցից ով կարող է զսպել Ադրբեջանին, որ կողմն ունի լծակներ: Պետք է զանգեր կատարել էսկալացիան կանխելու համար, ոչ թե հետո, երբ Ադրբեջանը գնա գործողությունների: Իրավիճակն իրապես բարդ է, և արագ կանխարգելիչ քայլեր են պահանջվում մեր կողմից»: