«Հենց այդ պատճառով էլ պրոբլեմները շարունակում են ավելանալ ու խորանալ». Պիպոյան

«Իրազեկ և պաշտպանված սպառող» ՀԿ նախագահ Բաբկեն Պիպոյանը գրել է․ «Լինում են դեպքեր, երբ մարդը հասկանում է, որ միայն սոցիալական ցանցում գրելը բավարար չէ՝ գործողություն է պետք:
Օրինակ, երբ մարդը վատառողջ է, կարող է նաև այդ մասին գրառում անել: Բայց գրառում անելուց հետո գիտի, որ լավագույն դեպքում պետք է հայտվեն բուժման ձևեր առաջարկողներ ու զորակցողներ, իսկ բուժվելու է դեղով կամ թեյով: Նույնն է, երբ մարդը սոված է կամ ծարավ: Գրառումից հետո առավելագույնը խորհուրդ ստանա՝ ինչ ուտել կամ խմել, իսկ ավելի հավանական է պարզապես իմանա, որ էլի մարդիկ կան, որ իր պես սոված ու ծարավ են: Քիչ երջանիկներին էլ ինչ-որ մեկը կառաջարկի մի տեղ հաց ուտել, բայց, ի վերջո, ուտողն ինքն է լինելու և միայն գրառում անելով չի կշտանալու: Ու նման գրառումներից հետո հեղինակները երբեք էլ միայն գրառումով չեն բավարարվում՝ հաջորդում է գործողությունը՝ ուտել, խմել, բուժվել և այլն: Իսկ երբ հերթը հասնում է երկրում առկա պրոբլեմներին, չգիտես ինչու, գրառումը դառնում է բավարար և համարժեք գործողություն չի հետևում: Հենց այդ պատճառով էլ պրոբլեմները շարունակում են ավելանալ ու խորանալ»: