«Մենք ունենք ոչ թե ընտրության, այլ պատրաստվելու խնդիր». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «Որքան էլ չհնչի տարօրինակ (քաղաքական մտածողության պարագայում այդտեղ տարօրինակ ոչինչ չկա իհարկե), բայց Կովկասի ռեգիոնալ կայունության հարցում վճռորոշ հանգամանքը թերեւս Էրդողանի «ինքնիշխան» վերընտրությունն է:
Այդ դեպքում, ռեգիոնալ մեծ ապակայունացման ռիսկը, որի հանդեպ Հայաստանը բնականաբար գերզգայուն օղակներից մեկն է, կնվազի շոշափելիորեն: Դա չի նշանակում, թե կնվազեն այլ ռիսկեր՝ ավելի լոկալ բնույթի, որ կան Հայաստանի համար: Բայց, այդ իմաստով, Հայաստանը ցավոք սրտի վատի ու վատթարի առաջ է, բայց ոչ թե ընտրության, այլ՝ պատրաստվելու:
Այսինքն, Հայաստանը չի ընտրելու՝ վատ, թե վատթար, որովհետեւ, եթե հարցը լիներ Հայաստանի ընտրությունը, ապա բնականաբար մենք կընտրեինք նվազագույնը՝ լավի ու վատի, ոչ թե վատի ու վատթարի միջեւ: Ես էլ չեմ խոսում՝ լավի ու լավագույնի միջեւ ընտրության մասին:
Բայց, մենք այստեղ ունենք ոչ թե ընտրության, այլ պատրաստվելու խնդիր: Ընդ որում, պատրաստվել ոչ թե՝ իբրեւ պետության ցուցանակի ներքո, բայց ազգային-ազատագրական մասշտաբով, այլ պետական համալիր աշխատանքի, որը պետք է ներառի տնտեսություն-դիվանագիտություն-պաշտպանություն շղթան:
Այդ շղթայի միջոցով է, որ մենք պետք է առավելագույնի հասցնենք լոկալ խնդիրներում մեր կարողությունները, որպեսզի դրանով բարձրացնենք նաեւ մեր դիվանագիտության էֆեկտիվության նախադրյալները: Որովհետեւ, լոկալ ռիսկերը լինելու են անխուսափելիորեն, եւ ավելին՝ Էրդողանի «ինքնիշխան» վերընտրությունը մեծ հավանականությամբ կավելացնի դրանք: Բայց, մեզ համար, բնականաբար, առավել նախընտրելի է պատրաստվել հենց լոկալ ռիսկեր չեզոքացնելուն, կանխելուն կամ հակազդելուն, քան ռեգիոնալ մեծ ապակայունացման, որում մեզ անխուսափելիորեն վերապահվելու է պոլիգոնի «ճակատագիրը»»: