«Պիտի անպայման անեին այս կասկածելի սիրահետումը». Սամսոն Գրիգորյան

Գործարար Սամսոն Գրիգորյանը ֆեյսբուքյան իր էջում գրել է. «Չեմ քննարկի դրոշի վառել-չվառելու նպատակահարմարությունը։ Բոլորդ եք տեղյակ իմ վերաբերմունքին այդ երկրին և դրա սիմվոլներին։
Դեռ նրանց ծեծված տարիներին քանիցս հայկական սպորտային և այլ պատվիրակությունները չեն մասնակցել այնտեղ կայացող միջոցառումներին, օբյեկտիվ և սուբյեկտիվ պատճառներով։ Շատ են եղել դեպքեր, երբ նրանք են կոծկված իրավիճակ ստեղծել, որի հետևանքներն հաշվի առնելով, մերոնք հրաժարվել են մասնակցությունից։ Իրավիճակ ստեղծելու շատ միջոցներ կան, բերեմ մեկ ամենատարածված օրինակը՝ «Չենք կարող երաշխավորել անվտանգությունը»։
Սա դիվանագիտություն է, նման մի բան պետք է անես, երբ գիտես, որ այդ երկրի սիմվոլները քո երկրում անընդունելի են, հնարավոր են ֆորս մաժորային իրավիճակներ։ Երբ հասկանում ես, որ, շատ դեպքերում, նույնիսկ արդարացի արված քայլը միջազգային հարթակներում կվնասի երկրիդ իմիջին։
Բայց չէէէ, մերոնք պիտի անպայման անեին այս կասկածելի սիրահետումը, պիտի ստեղծեին իրավիճակ, որ ժողովրդին պառակտեին, որ ապագայում համաշխարհային սպորտային կազմակերպությունների հետ խնդիր ունենանք։
Նման հիմարությունների սիրահարներին խորհուրդ կտամ ՀՀ-ում կազմակերպել օրինակ «մեծ թուրանի» համաժողով՝ թքած հետևանքների վրա, մի՞թե չեք ուզում պապից կաթոլիկ լինել, ցույց տալ, որ դուք դեմոկրատիայի աստվածներ եք։
Խելացի, դիվանագետ կառավարումը կայանում է հենց դրանում, որ քայլերը հաշվարկես, չվնասես, չլարես, չպառակտես»: