Ալեն Սիմոնյանի կողմից քաղաքացու դեմքին թքելու դեպքով իրավապահները վարույթ չեն նախաձեռնել

ԱԺ նախագահ Ալեն Սիմոնյանի կողմից քաղաքացու դեմքին թքելու դեպքով իրավապահները խուլիգանություն և պաշտոնեական լիազորությունների չարաշահում «չեն տեսնում»։

Հիշեցնենք, որ մարտի 3-ին, քաղաքացի Կարեն Մկրտչյանը ֆեյսբուքյան էջում հայտնել էր, որ Ազգային ժողովի նախագահ Ալեն Սիմոնյանը հրահանգել է իր թիկնազորի աշխատակիցներին բռնել նրան և թքել է վրան այն բանից հետո, երբ Կարենը Ալեն Սիմոնյանին դավաճան է անվանել։ Ավելին, ոստիկանները բերման էին ենթարկել ոչ թե Ալեն Սիմոնյանին, այլ նրա ոչ իրավաչափ գործողությունների հետեւանքով տուժած քաղաքացուն։
Նկատենք, որ Ալեն Սիմոնյանն ավելի ուշ ֆեյսբուքյան գրառմամբ չէր հերքել կատարվածը։

«Ականջներիդ օղ արեք», որ ձեր լկտիությունն անպատասխան չի մնալու ՀՀ օրինական իշխանությանը վիրավորելուն լինելու է օրինական պատասխան»,- նշել էր Սիմոնյանը: Իրավապահներն իրենց նախաձեռնությամբ դեպքին չեն արձագանքել, հրապարակումներին ընթացք չեն տվել, թեև քրեական դատավարության օրենսգրքով մամուլի հրապարակումները ևս առիթ են՝ քրեադատավարական ընթացակարգով քննություն սկսելու համար։

Ապրիլի 5-ին «Իրազեկ քաղաքացիների միավորում» ՀԿ-ն հայտարարեց, որ հանցագործության մասին հաղորդում է ներկայացրել՝ կապված Ազգային ժողովի նախագահ Ալեն Սիմոնյանի կողմից քաղաքացու դեմքին թքելու մասին չհերքված լուրի և ոստիկանության կողմից այդ քաղաքացուն առերևույթ ապօրինի բերման ենթարկելու դեպքի մասով:

«Մասնավորապես, քաղաքացու դեմքին ենթադրաբար (չհերքված) թքելու մասով խնդրել ենք քրեական վարույթ նախաձեռնել խուլիգանության (2021 թ. Քրեական օրենսգրքի 297-րդ) հոդվածով:

Իսկ քաղաքացուն առերևույթ ապօրինի բերման ենթարկելու մասով) ակնկալում ենք քրեական վարույթի նախաձեռնում պաշտոնատար անձի կողմից լիազորությունների չարաշահման (ՔՕ հոդված 441) կամ ազատությունից ապօրինի զրկելու (ՔՕ հոդված 192) փաստի առթիվ»,- ֆեյսբուքյան իր էջում գրել էր Դանիել Իոաննիսյանը։
Դատախազությունը ներկայացված հաղորդումն ուղարկել էր ՔԿ, որտեղ քրեական վարույթ չի նախաձեռնվել։ ՀՀ ՔԿ-ից «Փաստինֆո»-ի հետ զրույցում հայտնեցին, որ կազմվել է քրեական վարույթ չնախաձեռնելու արձանագրություն։

«Հաղորդման մեջ նշված հանգամանքներն ուսումնասիրվել են և գնահատվել է, որ բավարար հիմքեր չկան քրեական վարույթ նախաձեռնելու ու կազմվել է քրեական վարույթ չնախաձեռնելու արձանագրություն»,- նշել են ՔԿ-ից։