«Մեր անվտանգային խնդիրը ոչ թե ռեսուրսներով թշնամուն զիջելու մեջ է, այլ՝ եղածը անկազմակերպ օգտագործելու». Վահրամ Մարտիրոսյան

Zangi-ի հիմնադիր Վահրամ Մարտիրոսյանը ֆեյսբուքյան իր էջում գրել է. «Գործող վարչապետը ասում է բանակին 1 միլիարդ գումար ենք հատկացրել, բայց չենք կարողանում ծախսել։ Եվ շարունակում է՝ թե 5 միլիարդ էլ կարող ենք հատկացնել, բայց օբյեկտիվ-սուբյեկտիվ պատճառներով այդ գումարը ի վիճակի չենք լինի իրացնելու։
Ամբողջ զավեշտը կայանում է նրանում, որ իսկապես Հայաստանի ներկա ֆինանսա-տնտեսական վիճակը լրիվ թույլ է տալիս 5 միլիարդ դոլար հատկացնել բանակին։ Եվ եթե այդ գումարը արդյունավետ ծախսվի, ապա մենք Ադրբեջանի նկատմամբ կարող ենք ստանալ նույնիսկ գերակայություն։
Նայում ես սրանց առածին ու արածին՝ նույնիսկ այդ 1 միլիարդը անիմաստ փոշիացնում են։ Առաջին հայացքից իբր դրական գործ են անում ու տեղական ռազմարդյունաբերությունից վերջապես մեծ քանակի գնումներ են կատարում։ Բայց մյուս կողմից այդ գնված տեխնիկան չունի որևէ ունիֆիկացիա, չկա տակտիկական և հաստիքային ինտեգրացիա։ Թշնամին թուրքական բայրակթառը, իսրայելական հառոփը, ֆրանսիական արբանյակները և սովետական սու25-երը ունիֆիկացրել և ինտեգրել էր մեկ միասնական համակարգի մեջ։ 44-օրյա պատերազմում թշնամու հաջողությունները ոչ թե զենքերի առկայության մեջ էր, այլ նրանց գրագետ տակտիկական ինտեգրացիայի մեջ էր։
Մյուս կողմից էլ լրիվ առանձին Հնդկաստանից ենք զենք ձեռք բերում։ Եվ այս ամբողջության հետ մեկտեղ մեր ռազմական պլանավորումը կատարվում է նախորդ պատերազմին պատրաստվելու տրամաբանության ներքո։ Իսկ ես համոզված եմ՝ լայնածավալ պատերազմի դեպքում Ադրբեջանը մեր վրա հարձակվելու է լրիվ այլ տակտիկայով, այլ տեխնոլոգիաներով և զինատեսակներով։ Մեր ներկա ունեցած ԱԹՍ-ների մեծ մասը ուղղակի անհնարին է լինելու կիրառել։
Այս իրողությունները ևս մեկ անգամ ի ցույց են դնում, որ մեր անվտանգային խնդիրը ոչ թե ռեսուրսներով թշնամուն զիջելու մեջ է, այլ մեր եղածը անկազմակերպ, քաոտիկ ու բառադի օգտագործելու, և ամենավատը՝ եղած պոտենցիալը չօգտագործելու մեջ է»: