«Ամերիկան ​​ցանկանում է մեր կողքին ահաբեկչական պետություն ստեղծել». Թուրքիայի ՆԳՆ ղեկավար

Թուրքիայի ներքին գործերի նախարար Սուլեյման Սոյլուն ԱՄՆ-ին մեղադրել է երկրի սահմանների մոտ ահաբեկչական պետություն ստեղծելու մտադրության համար։

«Ամերիկան ​​ցանկանում է մեր կողքին ահաբեկչական պետություն ստեղծել: Մենք նախազգուշական միջոցներ ենք ձեռնարկում. դրա դեմ մենք չորս խոշոր հատուկ գործողություն ենք իրականացրել (Սիրիայում և Իրաքում)»,- ասել է Սոյլուն թուրքական լրատվամիջոցներին։

Հիշեցնենք, որ օրեր առաջ Սոյլուն կոշտ հայտարարություններ էր արել ԱՄՆ-ի դեմ՝ մասնավորապես ընդգծելով, որ Վաշինգթոնը «շարունակում է կորցնել իր հեղինակությունը», իսկ ամբողջ աշխարհն «ատում է Ամերիկան»։ «Եվրոպա հասկացություն չկա… Կա միայն Ամերիկա: Իսկ Եվրոպան ամերիկյան գնացքի վագոններից մեկն է։ Եվրոպան այլ յուրահատկություններ չունի»։ Թուրքիայի ՆԳՆ ղեկավարի խոսքով, «Եվրոպան Ամերիկայի զինվորիկն է Աֆրիկայում։ Ամբողջ աշխարհն ատում է Ամերիկան. Աֆրիկյան բոլոր երկրներն ատում են իրենց շահագործող պետություններին»։

Անկարան բազմիցս քննադատել է Վաշինգթոնի համագործակցությունը PKK-ի սիրիական մասնաճյուղի հետ։ Թեև Միացյալ Նահանգները ճանաչում է նրան որպես ահաբեկչական կազմակերպություն, Վաշինգթոնը պնդում է, որ սիրիացի քրդերի հետ համատեղ աշխատանքի շնորհիվ հնարավոր եղավ պայքարել «Իսլամական պետության» դեմ։