«Մինչև հիմա Ռուսաստանն էր ձեր փրկությունը, հիմա էլ սպորտը՞». Սյուզան Սիմոնյան

Նախկին ՀԽ մամուլի խոսնակ Սյուզան Սիմոնյանը ֆեյսբուքյան իր էջում գրել է. «Սպորտի բոլոր ոսկե մեդալներն ի վիճակի չեն բացել Բերձորն ու ազատագրել Արցախը, ի վիճակի չեն անվտանգություն ապահովել Հայաստանի, քո տան ու զավակիդ համար։ Խելամիտ աշխարհաքաղաքականությունն ու քո կամքն է, որ պետք ապահովի դրանք հայրենիքիդ, տանդ ու զավակիդ համար։ Եթե վերջին հարյուր տարվա սպորտային հաղթանակները նպաստեին անվտանգությանը, ապա այսօր Հայաստանն առնվազն կայսրություն կլիներ։ Էս ի՞նչ աժիոտաժի մեջ եք։ Մինչև հիմա Ռուսաստանն էր ձեր փրկությունը, հիմա էլ սպորտը՞, որի շնորհիվ Հայաստանի հիմնը հնչում է տարբեր երկրներում։ Հնչեց, հետո՞, չեք հասկացե՞լ, որ դա ընդամենը պարապ վախտի խաղալիք է ցեղասպանությունից առաջ։ Լավ, պարապ վախտի խաղալիք չէ, խաղաղ վախտի խաղալիք է։ Ի վերջո, պատերազմի մեջ գտնվողի համար, յաթաղանի սպառնալիքի տակ գտնվողի համար դա մերկ հետույքի զանգուլակ է, եթե քաղաքավարի արտահայտեմ հին ասացվածքը։ Խելք հավաքեք։ Հիմա էլ թուրն առել սպորտն ե՞ք պաշտպանում։ Ձեզ ու ձեր ապագան պաշտպանեք, որ վաղը կարողանաք սպորտային հաճույքներ վայելել»։