«Ռուս-ուկրաինական պատերազմը չլիներ, Հայաստանի շատ գյուղեր հիմա դատարկված էին լինելու». Ոսկան Սարգսյան

Լրագրող Ոսկան Սարգսյանը գրում է. «Համաշխարհային բանկից, վարկային այլ կազմակերպություններից վերցված վարկերով, այսինքն՝ պարտքով սահմանամերձ գյուղերում դպրոցների, մանկապարտեզների շենքեր են կառուցում, սակայն այդ կրթօջախները հետո բավարար թվով սաներ, հաճախողներ ունենալո՞ւ են։ Իշխանությունը հպարտանում է պատերազմում մեր պարտությամբ, չի բացահայտում Գեղարքունիքի Ազատ գյուղում 15 զինվորների մահվան առեղծվածը, բավարար ուշադրություն չի դարձնում սահմանների պաշտպանվածությանը, գրավոր և բանավոր պայմանավորվածություններով հանձնում է Հայաստանի տարածքները, ո՞վ կուզենա ապրել այդ անպաշտպան երկրի հեռավոր, սահմանամերձ գյուղերում, իր զավակին ուղարկել բանակ, որի պաշտպանության նախարար Սուրեն Պապիկյանը շատ է զբաղվում կուսակցական գործերով, ՔՊ-ականներին համայնքի ղեկավար դարձնելով՝ ընտրություններով, իսկ գլխավոր շտաբի պետ Էդվարդ Ասրյանն էլ վախեցած եղջերուի նման փախչում է լրագրողների հարցերից։ Ռուս-ուկրաինական պատերազմը չլիներ, Հայաստանի շատ գյուղեր հիմա դատարկված էին լինելու, արտագաղթն ի՞նչ տեմպերով է լինելու, երբ այդ պատերազմն ավարտված լինի, Ուկրաինան էլ ԵՄ անդամության թեկնածու դառնա»: