«Ի վերջո ասեք՝ Վաշինգթոնում ի՞նչ է քննարկվում, ի՞նչ է սեղանի վրա». Գեղամ Մանուկյանը՝ Փաշինյանին

«Լսել էինք, որ թուրք ասելուց Նիկոլ Փաշինյանը չի նեղանում, էսօր էլ Ազգային ժողովի ամբիոնից հայտարարեց, որ դավաճան ասելուց չի նեղանում: Բայց հարցս ուրիշ է՝ Վաշինգթոնում ի՞նչ են խոսում, ի՞նչ են քննարկում: Արդյո՞ք սեղանին դրված է որևէ փաստաթուղթ»,- Ազգային ժողովում Փաշինյանին դիմեց ընդդիմադիր պատգամավոր Գեղամ Մանուկյանը:

«Այո, կա սեղանին փաստաթուղթ: Ես հանձնարարել եմ ԱԳՆ-ին, որ ձեզ հրավիրեն, ծանոթացնեն, իսկ տիկին Ագնեսա Խամոյանն ասաց՝ պետք չի: Կարող եք, այնուամենայնիվ, ծանոթանալ: Այդ փաստաթղթի մեջ ոչ մի նորություն չեք գտնի, որովհետև դրա մասին ասել եմ հարպարակային այս ամբիոնից: Թեզերի մասին ասել եմ, մանրամասների մասով, տեքստային տարբերակների մասով կարող եք և Ադրբեջանին ներկայացրածին ծանոթանալ, և մեր առաջարկներին ու ռեակցիաներին ծանոթանալ... Ես մեր բանակցող թիմին ասել եմ՝ ազատ ու վստահ բանակցեք, որովհետև միևնույն է, ստորագրողը ես եմ»,- պատասխանեց Փաշինյանը: