«Հակառակը, ոստիկանության բարեփոխումը հաջողված է»․ Նիկոլ Փաշինյան

Այս իշխանություններն ամենուրեք՝ որպես իր ձեռքբերում, մատնանշում է ոստիկանության բարեփոխումները: Դրանք որտեղ են արտացոլվում, եթե ամեն տեղ թմրամոլության, հանցավորության, խաղամոլության, ինքնասպանությունների, հանցագործությունների աճ է: Ազգային ժողովում նման դիտարկում հնչեցրեց Արթուր Խաչատրյանը: «Սրանք դժբախտ հասարակության սինդրոմներն են, այնինչ դուք խոստանում էիք երջանիկ հասարակություն»,- ասաց նա:

Ի պատասխան Փաշինյանն ասաց, թե աշխարհում չկա մի երկիր, որտեղ թմրամոլության աճ չգրանցվի, և դա տեխնոլոգիաների զարգացման հետևանք է: «Թմրամիջոցների ծավալն այնքան շատ է, որ ակնհայտ է, որ դրանց շրջանառությունն էլ մեծացել է: Մենք անվտանգության խորհրդի մակարդակով ենք դա քննարկել: Իսկ հանցավորության աճը ինչ-որ տեղ կարող է կապված լինել բնակչության ու տնտեսության աճի հետ:

....Ոստիկանության և ներքին գործերի բարեփոխումների փաթեթն ամբողջությամբ չի էլ ընդունվել, որ քննարկենք. բարեփոխումները դեռ ընթացքի մեջ են: Այնուամենայնիվ, կարող ենք ասել, որ ընդհակառակը, բարեփոխումները հաջողվել են»: