«Ինչով եք բացատրում կենսաթոշակային ֆոնդերի՝ մինուսով գնալը». Պետրոս Ղազարյան

Կենտրոնական բանկի նախագահի տեղակալ Արմեն Նուրբեկյանը «Հանրայինի» եթերում պատասխանեց Պետրոս Ղազարյանի հարցին՝ կենսաթոշակների մասին:

«Կենտրոնական բանկը հանդիսացել է Կենսաթոշակային համակարգի ներդրման ջատագովը: Ինչպե՞ս է ստացվել, որ ԿԲ-ն իր իսկ հիմնադրած կառույցում չի կարողանում ամրագրել ռիսկերի կառավարում, որովհետև մենք տեսնում ենք, որ կենսաթոշակային միջոցներն ունենում են բացասական հաշվեկշիռ. ինչպե՞ս»,- հարցրեց հարցազրուցավարը:

Նուրբեկյանը ճշտեց, որ բացասական միտումը դադարել է վերջին մի քանի ամսում: «Կենտրոնական բանկը չի հիմնադրել Կենսաթոշակային համակարգը: Ունենք ակտիվների 2 կառավարիչներ, որոնք այդ ամեն ինչը իրականացնում են: Իրենք անցած տարի, ինչպես և աշխարհում գրեթե բոլոր ֆոնդերը, գրանցել են բացասական եկամտաբերություն, որոնք կապված են եղել մի քանի գործոնների հետ: Առաջինը՝ փոխարժեքը, իսկ երկրորդը՝ նրանք ունեն պորտֆելային ներդրումներ արտասահմանում, իսկ մենք գիտենք, որ ֆինանսական ակտիվների շուկան 2022 թվականին և 2023-ի սկզբներին լուրջ վայրիվերումների է ենթարկվել: Սրանք են եղել անկման 2 հիմնական պատճառները: Սակայն կարևոր է, որ ի տարբերություն կարճաժամկետ ֆոնդեր կառավարողների, մեր կենսաթոշակային ֆոնդերն իրենց հաջողությունները չեն չափում մեկ տարով կամ մի քանի ամսով: Հետևաբար, նրանց համար այս մի բացասական շահութաբերությունը բացարձակապես ոչինչ չի նշանակում երկարաժամկետ շահութաբերության տեսանկյունից: Նրանք ունեն բավականին մեծ դրական եկամտաբերություն, անգամ՝ հաշվի առնելով վերջին զարգացումները»,- մանրամասնեց զրուցակիցը:

Առավել մանրամասն՝ տեսանյութում: