Մանրամասներ՝ Ճամբարակի քաղաքապետի ձերբակալության դեպքից

Հայաստանի Քննչական կոմիտեի Գեղարքունիքի մարզային քննչական վարչության Սևանի քննչական բաժնում նախաձեռնվել է քրեական վարույթ Ճամբարակ քաղաքի 3 բնակիչների նկատմամբ:
Ֆոտոլրագրող Գագիկ Շամշյանի հաղորդմամբ՝ այդ 3 անձինք քննիչի որոշմամբ ձերբակալվել են: Նրանք են Ճամբարակ համայնքի ղեկավար 40-ամյա Վազգեն Ադամյանը, նրա վարորդը՝ Ճամբարակ քաղաքի բնակիչ 36-ամյա Սամվել Նադարյանը, ով ոստիկանության նախկին գնդապետ, ոստիկանության Շիրակի մարզային վարչության նախկին պետ, գնդապետ Վարդան Նադարյանի ազգականն է և Ճամբարակ քաղաքի բնակիչ 29-ամյա Սևակ Ջառահյանը:

Մայիսի 4-ին, ժամը 22:30-ի սահմաններում ՀՀ Ներքին գործերի նախարարության Ոստիկանության Պարեկային ծառայության Գեղարքունիքի մարզի գումարտակի 1-ին վաշտի պարեկ Հուսիկ Հ.-ին Ճամբարակ քաղաքում ծառայության ընթացքում Սեպտեմբերի 21 փողոցում նկատել է, որ Toyota Raf 4 մակնիշի ավտոմեքենան խախտելով ճանապարհային երթևեկության կանոնները մեքենան կայանել է հետիոտնի համար նախատեսված անցման վրա, այնուհետև նշված ավտոմեքենան ստուգելու նպատակով Գարեգին Նժդեհ փողոցում պարեկի կողմից կանգնեցվել է, ինչից հետո վերջինս մոտեցել է վարորդին, ով հայտնել է, որ ինքը վարորդական իրավունքի վկայական այս պահին չունի, թողել է տանը:

Այդ ամենից հետո ավտոմեքենայի վարորդն ու ուղևորը, որոնց հետո միացել են 20-25 հոգի, սկսել են քաշքշել Հուսիկ Հ.-ին ու մյուս պարեկ Վահե Ք.-ին, նրանց հասցեին տվել հայհոյանքներ, իսկ հավաքվածներից մեկն էլ բռունցքով հարվածել է Վահե Ք.-ին: Պարեկները, տեսնելով, որ հավաքվածները չեն ենթարկվում իրենց օրինական պահանջին, չեն դադարեցնում հայհոյանքները, օրենքի սահմաններում կիրառել են արցունքաբեր գազ:

Ոստիկաններին հաջողվում է հայտնաբերել Ճամբարակի համայնքապետ Վ. Ադամյանին, նրա վարորդ Ս. Նադարյանին և կռվի մասնակիցներից Ս. Ջառահյանին: Ձեռնարկվում է անհրաժեշտ օպերատիվ հետախուզական միջոցառումներ կռվի մյուս մասնակիցների ինքնությունը պարզելու և նրանց հայտնաբերելու ուղղությամբ:

Վնասվասել է նաև Պարեկային ծառայության ավտոմեքենան: