«Ձերբակալման որոշման մեջ նշված է, որ ազատության մեջ գտնվելու դեպքում Գայանե Մարտիրոսյանը կարող է կրկին առևանգել Աշոտ Փաշինյանին». փաստաբան

«Գայանե Մարտիրոսյանը (անձնագրով Ազգուշ Մարտիրոսյան) հայտարարել է հացադուլ, ընդ որում, ինքը փաստացի հացադուլի մեջ էր գտնվում երեկվանից՝ 15:00-ից սնունդ չէր ընդունել: Այս պահից պաշտոնապես դիմել է հացադուլի վերաբերյալ, նշել է, որ ունի բազմաթիվ հիվանդություններ, իր կյանքին վտանգ սպառնալու դեպքում պատասխանատու է ՀՀ-ն՝ ի դեմս իրավասու մարմինների»,- ՁՊՎ-ի մոտ լրագրողների հետ զրույցում ասել է փաստաբան Վահան Հովհաննիսյանը: Նրա խոսքով՝ ձերբակալման որոշմամբ որպես ձերբակալման նպատակ նշվել էին այնպիսի հանգամանքներ, որոնք ոչ միայն իրավաչափ չէին, այլև ծիծաղելի. «Նշեմ, թե որոնք էին նշվել ձերբակալման նպատակները: Առաջին՝ փախուստը կանխելը, երկրորդ՝ բառացի նշված է, որ ազատության մեջ գտնվելու դեպքում Ազգուշ Մարտիրոսյանը կարող է կրկին առևանգել Աշոտ Փաշինյանին: Հիմա մենք այդ հիմքով ձերբակալման իրավաչափությունն անհապաղ կբողոքարկենք դատարան»,- ասել է փաստաբանը: