«Պարեկները հրահանգ ունեն «զրոյական» վարչական ակտ կազմել մգացված ապակիներով ավտոմեքենաների վարորդների նկատմամբ». Հեքիմյան

Պահպանողական կուսակցության նախագահ Կարեն Հեքիմյանի գրառումը. «Փողոցում զրուցեցի առաջին պատահած պարեկի հետ: Վերջինս ասում է, որ պարեկները հրահանգ ունեն «զրոյական» վարչական ակտ կազմել մգացված ապակիներով ավտոմեքենաների վարորդների նկատմամբ: Իսկ «զրոյական» ակտ նշանակում է, որ իրականացվելու է նույն վարչարարությունը, կազմվելու է նույն վարչական ակտը, սակայն՝ առանց տուգանքի: Դե, գրավոր նախազգուշացման նման մի բան է:
Բացի դրանից՝ «զրոյական» վարչական ակտը գործում է 24 ժամ: Ժամկետը լրանալուն պես ավտոմեքենայի վարորդի նկատմամբ հաջորդ վարչական ակտն իր մեջ այլևս տուգանք է պարունակելու:
Փաստորեն, ամեն ինչ թողնվեց պարեկների հայեցողությանը: Եթե վերջիններս կամենան, ապա, օրինակ՝ ես կարող եմ երբևէ «զրոյական» ակտի դափնեկիր չդառնալ և, հետևաբար՝ մնացած ողջ կյանքս ավտոմեքենան վարել մգացված ապակիներով:
Կարևորը «զրոյական» ակտ չունենալն է»: