Դնեպրը վերադարձել է բնական հուն

26564

Հինգշաբթի, 22 հունիսի, 2023 թ., 01:36

Խերսոնի շրջանի ղեկավարի պաշտոնակատար Վլադիմիր Սալդոն «Տավրիա» ռադիոյի եթերում հայտարարել է, որ Դնեպրը բնական հուն է վերադարձել։

Սալդոյի խոսքով՝ Կախովկայի հիդրոէլեկտրակայանից ներքև Դնեպրը մտել է իր բնական հունը, սակայն տարածքը գտնվում է էկոլոգիական աղետի մեջ։ Հաղորդվում է, որ ձախ ափին դրա հետևանքները մեղմելու նպատակով աշխատանքներ են կազմակերպվել ջրից ազատված տարածքների մաքրման և ախտահանման ուղղությամբ։

Ավելի վաղ Սալդոն ասել էր, որ Կախովկա հիդրոէլեկտրակայանի պատնեշը վերակառուցման կարիք կունենա, ինչը ավելի հեշտ ու էժան կլինի, քան այն վերականգնելը։

Հիշեցնենք, որ հունիսի 6-ի գիշերը Խերսոնի մարզում Նովայա Կախովկայի մոտ ավերվել է Կախովկայի հիդրոէլեկտրակայանի վերին մասը։ Տասնյակ բնակավայրեր, այդ թվում՝ Խերսոնն ու Նոր Կախովկան, սկսել են հեղեղվել ջրով։

Ռուսաստանն ու Ուկրաինան միմյանց մեղադրում են ամբարտակը քանդելու մեջ։ Կա նաև վարկած, որ վթարը տեղի է ունեցել «հին վնասի» պատճառով։ «Ուկրհիդրոէներգո» ընկերությունը հայտարարել է, որ կայանն ամբողջությամբ ավերվել է և չի կարող վերականգնվել։