«Բանը բանից անցնում է. ես հայտարարում եմ գործադուլ». Արսեն Բաբայան

Փաստաբան Արսեն Բաբայանի ֆեյսբուքյան գրառումը. «Վստահաբար, շատերդ եք տեղյակ, որ փաստաբանները վաղը իրականացնելու են մեկօրյա (առայժմ) բողոքի ակցիա և պետական մարմիններ, այդ թվում դատարաններ, չեն այցելելու: Մեր այս բողոքի ակցիայով (գործադուլ) իշխանությանը նախազգուշացնում ենք, որ բանը բանից անցնում է, որ այսպես շարունակվելու դեպքում մենք կդառնանք ամենաթիրախավորված և ամենաամոթալի վիճակում գտնվող պետությունը նույնիսկ միջին ժողովրդավարական պետությունների շարքում: Այս քաղաքացիական ակցիայով մենք ընդգծում ենք, որ բռնությունը չպետք է տեղ ունենա իրավապահ մարմիններում, իսկ փաստաբանի նկատմամբ բռնություն իրականացնողը պետք է ստանա ամենախիստ պատիժը:
Մենք տեսնում ենք, որ իշխանությունը մտադիր չէ կանխել մեր վստահորդների և մեր նկատմամբ իրավապահների կողմից իրականացվող հանցագործությունները: Մենք նախազգուշացնում ենք, որ իրավապահների անպատժելիությունը չենք հանդուրժելու, որ հետևողական ենք լինելու մեր նպատակին հասնելու համար: Մենք ազդարարում ենք, որ մեր նպատակը հանուն պետության է, հանուն ժողովրդավարության և իրավականության ամրապնդման է:
Մենք հույս ունենք, որ գործադուլի մեկօրյա ակցիան կկատարի իր առաքելությունը և այլևս ստիպված չենք լինի շարունակել այդպիսի բողոքի ակցիաները:
Մեր վստահորդներն արդեն տեղյակ են և իրենց զորակցությունն են հայտնել մեզ:
Այսպիսով, վաղը, հունիսի 26-ին, խոշտնգումների զոհերի աջակցության միջազգային օրը, ես հայտարարում եմ գործադուլ»: