«Լաշա Արսենիձեն պետք է ներողություն խնդրի հայ ազգից». Վրաստանի հայ համայնք

Վրաստանի հայ համայնքը ֆեյսբուքյան էջում հայտնում է. «2023 թվականի հունիսի 30-ին Վրաստանի ՆԳՆ Թբիլիսիի ոստիկանության բաժնից, ի պատասխան Թբիլիսիի դատախազության 2023 թվականի մայիսի 16-ին ներկայացված դիմումի, մեզ հայտնեցին, որ Լաշա Արսենիձեի կողմից հայ ազգի հասցեին հնչեցրած բացահայտ սպառնալիքը Վրաստանի քրեական օրենսգրքով հանցագործություն չի համարվում, և մերժում ստացանք նրա նկատմամբ քրեական օրենսգրքով պատիժ նշանակելու։
Տեղեկացնում ենք, որ մենք համաձայն չենք այս որոշման հետ և մտադիր ենք այն բողոքարկել։
Հիշեցնենք, որ միաժամանակ Վրաստանի մասշտաբով շարունակվում է ստորագրահավաքի գործընթացը՝ հայցով դատարան դիմելու խնդրանքով. Լաշա Արսենիձեն նույն սոցիալական ցանցերի միջոցով պետք է ներողություն խնդրի հայ ազգից:

2023 թվականի մայիսի 14-ին, «Ֆեյսբուք» սոցիալական ցանցի միջոցով տեսանյութ էր տարածվել, որտեղ մի երիտասարդ անպարկեշտ խոսքերով դիմում էր հայ ազգին, հայհոյում և վիրավորում մեզ։ Ինչպես պարզվեց ավելի ուշ, այդ անձը Լաշա Արսենիձեն էր»: