Ռուսներն օգտագործում են շարժական դիակիզարաններ՝ նշանակալից կորուստները թաքցնելու համար. Ուկրաինայի Գլխավոր շտաբ

Ռուս զավթիչներն ամեն օր զգալի կորուստներ են կրում, որոնք փորձում են թաքցնել, շարունակում են կիրառել մահացածների ընտանիքներին ռուսական քարոզչության կողմից գովազդվող նպաստներից ու փոխհատուցումներից զրկելու՝ ռուսական ավանդական գործելակերպը։ Դրա համար ակտիվորեն օգտագործվում են շարժական դիակիզարաններ։

Այս մասին հուլիսի 1-ի երեկոյան հայտնել է Ուկրաինայի պաշտպանության նախարարության գլխավոր շտաբը։
«Մասնավորապես, պարզվել է, որ այդ դիակիզարաններից մեկը Բերդյանսկի նավահանգստի տարածքում գործում է 24/7 ռեժիմով: Ներկա պահին զոհված ռուս զինծառայողների մոտ 50 դիեր, որոնք վերջերս ռազմական գործողությունների շրջաններից տեղափոխվել են տեղի դիահերձարան, սպասում են դիակիզման»,- նշված է ամփոփագրում։

Գլխավոր շտաբը նշել է, որ զոհված ռուս զինծառայողների դիակիզումն իրականացվում է առանց նրանց նույնականացման և հաշվառման։

Ուկրաինական կողմը նաև նշել է, որ Խերսոնի շրջանում 10 ռուս զինվոր պայթել է նախորդ հերթափոխի կողմից տեղադրված ականների վրա։