Կաքավաձորցիները փակել են Երևան-Գյումրի ճանապարհը

Այսօր՝ հուլիսի 3-ին, լարված իրավիճակ է ստեղծվել Արագածոտնի մարզում։ Արդեն 30 րոպե է՝ բնակիչները փակել են Երևան-Գյումրի ավտոճանապարհի՝ Կաքավաձոր գյուղի գլխավոր խաչմերուկը՝ պահանջելով հանդիպում Արագածոտնի մարզպետի հետ։ Ֆոտոլրագրող Գագիկ Շամշյանի հետ զրույցում բողոքի ցույցի մասնակից գյուղացիներն ասել են․ «Արդեն տևական ժամանակ է՝ պատկան մարմինները խոստացել են, որ գյուղ մտնող 6 կմ-անոց ճանապարհը կվերանորոգեն։ 30 տարի է՝ սպասում ենք, թե մեր գյուղում էլ է արև ծագելու։ Բազմաթիվ անգամներ, երբ մարդ է վատացել, շտապօգնություն ենք կանչել, ասել են՝ չենք կարող գալ, քանի որ ամբողջ ճանապարհը մարդաբոյ փոսեր են։ Գյուղից մինչև հիվանդին տեղափոխում են, 1,5 ժամ է տևում։ Եվ հարց է՝ հիվանդին կտեղափոխեն հիվադանո՞ց, թե՞ մորգ։ Ստիպված ենք դիմում այս ծայրահեղ քայլին, քանի որ հույս չունենք, թե մեր գրավոր դիմումներին կպատասխանեն։ Մեր համբերության բաժակը լցվել է։ Վարչապետ Նիկոլ Փաշինյանը հայտարարում է, թե հանրապետությունում մեծ թափ է հավաքել ճանապարհաշինությունը, բայց մեզ մոտ ոչ մի շոշափելի արդյունք։ Խնդրում ու պահանջում ենք, որ էդ 6 կմ-անոց ճանապարհը վերանորոգեն։ Չե՛նք բացելու ճանապարհն այնքան, մինչև մարզպետարանից չգան»։

Մանրամասները՝ սկզբնաղբյուրում: