«FLY ONE-ից բոլորը դժգոհ են ու խոսում են, բայց պատասխանատուները շարունակում են անհաղորդ մնալ». Բաբկեն Պիպոյան

«Իրազեկ և պաշտպանված սպառող» ՀԿ նախագահ Բաբկեն Պիպոյանը գրել է․ «Քանի օր է՝ համացանցը քննարկում է FLY ONE-ի «շատ կազմակերպված» աշխատանքը: Նախքան իրավիճակի ընդհանուր բնութագրումն ու գնահատական տալը, մի փոքր պատմություն էլ ես պատմեմ:
Մեկնում էինք հանգստի: Մոտ 200$ ավելի վճարեցինք, որպեսզի գիշերը օդանավակայանում «չտանջվենք» և վերադառնանք առավոտյան չվերթով՝ նորմալ քուններս առած: Վերադառնալու օրը զանգ ստացանք՝ պարզվեց, որ մեր հետևից առավոտյան 7-ի փոխարեն 5-ին են գալու, որովհետև թռիչքը նախատեսվածից շուտ է լինելու: Այն, որ չքնեցինք և ստացվեց, որ անիմաստ էինք վճարել, դա մի կողմ՝ անգամ շուտ տեղ հանելու համար ուրախ էինք: Օդանավակայանում արդեն պարզվեց, որ, այդուհանդերձ, շուտ չենք թռչի և թռիչքը կլինի ի սկզբանե նախատեսված ժամին (ստացվեց, որ անիմաստ չքնեցինք, շուտ էլ տեղ չենք հասնի), իսկ արդեն ավելի ուշ պարզվեց, որ անգամ ի սկզբանե նախատեսված ժամից մոտ մեկ ժամ էլ ուշ է լինելու թռիչքը: Ինչու այսքան երկար գրեցի, որովհետև, երբ կարդում եմ մյուսների գրառումները, մենք անգամ «լավ էլ պուպուշ չվերթ ենք ունեցել»:
Հիմա կարևորի մասին՝ բոլորը դժգոհ են ու խոսում են, բայց պատախանատուները շարունակում են անհաղորդ մնալ:
Ոչ տնտեսվարողն է իրեն նեղություն տալիս, ոչ էլ պատկան կառույցներն են մտածում արձագանքելու և քայլեր ձեռնարկելու մասին: «Սպառողների իրավունքների պաշտպանության մասին» վաղուց հնացած օրենքը ամբողջությամբ վերանայելու կարիք ունի: Հարկավոր է ներառել նաև «օդային օրենսդրությամբ»/ (և ոչ միայն) սահմանված իրավունքները:
Հ.Գ. Եթե չեք մոռացել, վաղուց ուշացրել եք այն ժամկետները, որոնք երաշխավորել էիք անգամ միջազգային պայմանագրերով: Գործընկերների մասին խոսելիս, հիշեք, որ իրենք հիշում են:
Հ.Գ.2 Ճիշտ է՝ Էկոնոմիկայի նախարարությունն է ոլորտի քաղաքականության ուղիղ պատասխանատուն ու լիազոր մարմինը, բայց Արդարադատն էլ կարող է մեկ-մեկ աջ ու ձախ նայել ու տեսնել, թե այլ երկրներում արդյո՞ք կառույցը ձեռքերը լվացած կողքից է հետևում:
Հ.Գ.3 Կառավարությունում CEPA-ի մասին հիշող կա՞»: